ភ្នំពេញៈ ចាប់តាំងពីកម្ពុជាបានជួបប្រទះ នឹងការឆ្លងរាលដាលជាសហគមន៍ រលកទី៣ថ្ងៃទី២០ កុម្ភៈ ២០២១មក ឃើញថាអាជីវកម្មជាច្រើន បានបន្តបិទទ្វារនិងបិទទ្វារ ជាអាជីវកម្មជាច្រើន សកម្មភាព នៃការជួញដូរនានាក៏ត្រូវបានអាក់ខាន ក្នុងនោះដែរការទិញលក់ដីធ្លី នៅក្របខណ្ឌទូទាំងប្រទេសក៏បានថមថយដែរ តែរក្សាតម្លៃនៅថេរ។
លោកឌឹត ចណ្ណា ប្រធានក្រុមហ៊ុនឡាក់គី រៀលធីបានឱ្យដឹងថា ជាទូទៅយើងឃើញថា ចាប់តាំងកម្ពុជាបានជួបនឹងព្រឹត្តិការណ៍ សហគមន៍២០ កុម្ភៈ យើងឃើញថាការជួបចរចាផ្ទាល់កាន់តែពិបាក ដែលធ្វើការទិញលក់ដីធ្លីជួបបញ្ហាច្រើន។ អ្នកទិញមិនអាចជួបអ្នកលក់ដោយផ្ទាល់ ហើយពួកគេត្រូវជួបតាមទូរសព្ទឬតាមអនឡាញ ដែលធ្វើឱ្យសកម្មភាពនៃការទិញលក់មានថយចុះមួយចំនួន ។
លោកបន្តថា ដោយសារតែបម្រាម នៃការជួបជុំគ្នា ធ្វើឱ្យធុរជនឬក៏វិនិយោគិន មិនអាចជួបជុំក្នុងការពិភាក្សា ដើម្បីបង្កើតមុខជំនួញបាន មានតែការជួបគ្នាតាមអនឡាញមួយចំនួន តែមិនមានច្រើនប៉ុន្មានទេ ហើយបើជួបក៏ជាការជួប ដើម្បីបន្តគម្រោង ដែលបានរៀបចំកាលពីពេលកន្លងមកដែរ ដោយឡែកគម្រោងថ្មីៗ គឺពិបាកនឹងបង្កើតឡើងក្នុងវិបត្តិកូវីដ១៩នេះ ទើបធ្វើឱ្យការទិញលក់ដីធ្លី សម្រាប់អភិវឌ្ឍន៍ មិនមានសកម្មភាពដូចមុន ។
លោកបន្តថា “ថ្វីតត្បិតតែការទិញលក់ដីធ្លី មិនសូវមានសកម្មភាពក៏ពិតមែនក្ដី តែតម្លៃវិញយើងឃើញថា មិនមានការថយចុះទេ តំបន់ខ្លះគឺនៅរក្សាតម្លៃថេរ និងមានតំបន់ខ្លះ បែរជាឡើងថ្លៃបន្តិចទៅទៀត” ។
លោកបន្ថែមថា “បើទោះជាមានវិបត្តិនៃជំងឺកូវីដ១៩ និងមិនមានការទិញលក់ដីធ្លី និងអចលនទ្រព្យក៏ពិតមែនក្ដី ក៏អ្នកជំនួញ ក្នុងវិស័យអចលនទ្រព្យ មិនមានការខាតបង់លុយកាក់អ្វីនោះដែរ” ។
បើមានវិបត្តិ អ្នកមានលុយអត់បញ្ចេញលុយ សម្រាប់ទិញ ដូច្នេះលុយគេនៅតែលុយគេអត់មានបាត់ទៅណាដែរ តែសម្រាប់អ្នកដែលត្រូវការចំណូលប្រចាំខែ ដើម្បីដោះស្រាយជីវភាព នោះទើបមានផល ប៉ះពាល់ខ្លាំង បើមិនមានការវិនិយោគ ។ និយាយរួមផលប៉ះពាល់ នៃការមិនមានការទិញលក់នៃ គឺវាប៉ះដល់អ្នកដែលមានជីវភាព ក្រោមធម្យម និងមធ្យម ។
ជាមួយគ្នានេះ លោកលឹម រដ្ឋាភ្នាក់ងារអចលនទ្រព្យមួយរូប ប្រចាំខេត្តកែប បាននិយាយថា តម្លៃដីធ្លីនៅក្នុងខេត្តកែប និងកំពត ជាពិសេសដីដែលមានសក្ដានុពលខ្ពស់ដូចជានៅមាត់ព្រែក មាត់ឆ្នេរ មិនត្រឹមតែមិនធ្លាក់ថ្លៃទេ តែដីខ្លះមានតែឡើងថ្លៃទៅវិញ។
លោកបន្តថា “ម្ចាស់ដី ដែលមិនមានបញ្ហា ឬមិនត្រូវការលុយ សម្រាប់ដោះស្រាយ គឹមិនបញ្ចុះតម្លៃដីឡើយ មានតែចង់ឡើងដូច្នេះហើយទើបធ្វើឱ្យដីនៅតំបន់ខ្លះ នៅតែរក្សាតម្លៃបានល្អប្រសើរ” ៕
