ភ្នំពេញ៖ តារាសម្ដែង និងម៉ូឌែលល្បីឈ្មោះ ទឹម រដ្ឋា បានបង្ហើបថា នឹងធ្វើពិធីជប់លៀងអាពាហ៍ពាហ៍ នៅខែមីនា ឆ្នាំ២០២២ ខាងមុខ បន្ទាប់ពីសាងស្នេហ៍ជាមួយមិត្តប្រុសជនជាតិអាមេរិក-អេស្ប៉ាញ អស់រយៈពេល ៦ឆ្នាំ ។
ជាការពិត ទឹម រដ្ឋា បានភ្ជាប់ស្នេហ៍ជាមួយគូស្នេហ៍ឈ្មោះ Jovany Antonio ដែដែលជាបុរសអាមេរិកកាត់អេស្ប៉ាញ និងជាអ្នកជំនួញផ្នែកអចលនទ្រព្យ កាលពីឆ្នាំ២០១៦ ហើយកន្លងមកនាង ក៏ធ្លាប់ចេញទៅលេងខាងសាច់ញាត្តិរបស់គ្រួសារខាងប្រុសផងដែរ ទើបការស្វែងយល់ចិត្តគ្នា អស់រយៈពេល៧២ខែមកនេះ នាងកសម្រេចចិត្តដឹកដៃគូស្នេហ៍ ចូលរោងការតែម្ដង។
តាមរយៈសារព័ត៌មានក្នុងស្រុក ទឹម រដ្ឋា បានឱ្យដឹងយ៉ាងដូច្នេះថា នៅក្នុងពិធីជប់លៀងអពាហ៍ពិពាហ៍នោះ នាងនឹងរៀបចំចំនួន៨០តុ ដែលក្នុងនោះ នាងហៅភ្ញៀវតារា រួមអាជីពចំនួន៥០ ភាគរយ, ភ្ញៀវខាងក្រៅ ៥០ភាគរយ ខណៈដែលភ្ញៀវខាងអនាគតស្វាមីរបស់នាងមានដល់ទៅចំនួនខ្ទង់៤០០នាក់ ឯណោះដែលសុទ្ធសឹងតែជាអ្នកជំនួញ ។
តារាស្រីរាងខ្ពស់ស្រឡះខាងលើ ថែមទាំងបានប្រាប់ផងដែរថា នៅខែមីនាឆ្នាំ២០២២ ខាងមុខនេះ នាងរធ្វើពិធីជប់លៀងតែចំនួន៨០តុប៉ុណ្ណោះ ព្រោះនៅតែមានការប្រុងប្រយ័ត្នរឿងកូវីដ ហើយបន្ទាប់ពីនោះនាង នឹងទៅរៀបចំពិធីអាពាហ៍ពិពាហ៍ម្ដងទៀត នៅអាមេរិក ។
គួរឱ្យដឹងថា កាលពីថ្ងៃទី២៨ខែមីនាឆ្នាំ២០២១ លោកJovany Antonio ធ្លាប់បានបំពាក់ចិញ្ចៀន សុំ ទឹម រដ្ឋា រៀបការម្ដងរួចហើយ ដែលកាលនោះ ធ្វើឱ្យនាង រំភើបរហូតស្រក់ទឹកភ្នែកទៀតផង ដូច្នេះត្បិតតែមិនបានបញ្ជាក់ពីថ្ងៃធ្វើពិធី ក៏ទស្សនិកជន អាចកាត់យល់បានថា ទំនងជានាង យកថ្ងៃទី ២៨ ខែមីនា ធ្វើពិធីតែម្ដង ។
ក្រៅពីទឹម រដ្ឋា តារាដែលបានជ្រើសគូស្នេហ៍ជាបុរសបរទេសមានដូចជាកែវ ស្រីនាង,ហ៊ាប រ៉ាឌី ,ផូ មុនីពៅ ,ខៀវ សានសាណា ,អឿន ដាលីស និងស៊ូ អេណា ជាដើម៕ ដោយ៖ ម៉ានី
