ព្រឹត្តិការណ៍

ឥណ្ឌា វាយប្រហារពីដែនអាកាស​ លើជំរុំភេរវករ នៅប៉ាគីស្ថាន ស្លាប់យ៉ាងហោចណាស់ ១០នាក់

បរទេស៖ កងទ័ពឥណ្ឌាបានបើកការវាយប្រហារ លើជំរុំក្រុមសកម្មភាពព្រំដែន ប៉ាគីស្ថាន (BAT) ស្ថិតនៅក្នុងទឹកដីប៉ាគីស្ថាន ទល់មុខនឹងតំបន់ Tangdhar ដោយបានសម្លាប់មនុស្ស យ៉ាងហោចណាស់ ១០ នាក់។

យោងតាមសារព័ត៌មាន Sputnik ចេញផ្សាយកាលពីយប់ថ្ងៃអាទិត្យ ទី២០ ខែតុលា ឆ្នាំ២០១៩ បានឱ្យដឹងថា ការវាយប្រហារនេះបានកើតឡើងប៉ុន្មានម៉ោង បន្ទាប់ពីយោធាឥណ្ឌាបានបញ្ជាក់ថា ទាហាន ០២នាក់ និងជនស៊ីវិលម្នាក់​ត្រូវបានសម្លាប់ ដែលជាលទ្ធផល នៃការវាយប្រហារ​របស់ប្រជាជនប៉ាគីស្ថាន ទៅលើតំបន់មួយ ដែលស្ថិតនៅជិតបន្ទាត់​នៃការគ្រប់គ្រង។

បន្ទាប់ពីការប៉ះទង្គិចនេះ ក្រសួងការបរទេសប៉ាគីស្ថាន បានកោះហៅប្រេសិតឥណ្ឌា ជុំវិញការរំលោភបទឈប់បាញ់។

ភាពតានតឹងរវាងឥណ្ឌានិងប៉ាគីស្ថាន នៅក្នុងតំបន់មានជម្លោះ បានកើនឡើងជាមួយនឹងភាពក្លាំងក្លាឡើងវិញ កាលពីខែសីហា នៅពេលដែលរដ្ឋាភិបាល​​ ទីក្រុងញូវដែលី បានដកហូតស្វ័យភាពរបស់រដ្ឋ ចាមួ និងកាស្មៀរ និងបង្កើនវត្តមានយោធារបស់ខ្លួន នៅក្នុងតំបន់នោះ៕
ប្រែសម្រួលៈ ណៃ តុលា

Most Popular

To Top