តាមកំណត់ត្រាប្រវត្តិសាស្រ្តចិន (Records of the Grand Historian) ឱ្យដឹងថា ជាងទាំងអស់ដែលធ្វើរូបទាហានដីឥដ្ឋ ដើម្បីដាក់យាមផ្នូរអធិរាជ ឈីង សឺហ័ង នៃរាជវង្សឈីង កាលពីជាង២ពាន់ឆ្នាំមុននោះ គឺត្រូវកប់ទាំងរស់នៅក្នុងផ្នូរនេះ ដើម្បីលាក់ការសម្ងាត់ ពីការធ្វើទាហានដីឥដ្ឋ។
ស្តេចឈីង បានចេញ បញ្ជាឱ្យសង់ផ្នូរនេះ នៅពេលឡើងគ្រងរាជ្យក្នុងឆ្នាំ ២៤៦មុនគ.ស ក្នុងនោះទាហានដីឥដ្ឋ ត្រូវបានបញ្ជាឱ្យធ្វើឡើងដើម្បីយាមផ្នូរ ដោយមានជំនឿថា ទាហានទាំងនេះ នឹងបន្តតាមការពារទ្រង់ និងអំណាចក្រោយចូលទីវង្គត ។ ការធ្វើទាហានដ៏ឥដ្ឋនេះ គឺដើម្បីជំនួសពីការ យកជីវិតទាហាន ជាមនុស្សពិតមកយាម។
ចំពោះការសង់ផ្នូរនេះ ធ្វើឡើងលើផ្ទៃដីទំហំ៥០គីឡូម៉ែត្រការ៉េ ដោយប្រើកម្លាំងពលកម្មប្រមាណ ៧០ម៉ឺននាក់ឯណោះ ចំណាយពេល ៣៦ឆ្នាំ ពោលគឺផែនការនេះត្រូវបញ្ចប់ ពេលស្តេចចូលទីវង្គតក្នុងឆ្នាំ ២១០មុនគ.ស ។
សូមជម្រាបថា ក្រោយរកឃើញផ្នូរនេះនៅក្រុងស៊ីអាន ក្នុងឆ្នាំ១៩៧៤មក អ្នកស្រាវជ្រាវបានជីកកកាយឃើញ មានទាហានដីឥដ្ឋប្រមាណជាង ៨ពាន់រូប, រទេះចម្បាំង ១៣០គ្រឿង, សេះ ៦៧០ក្បាល។ ក្រៅពីនេះក៏មានតន្រ្តីករ សិល្បករ និងទាសីជាដីឥដ្ឋផងដែរ ៕
