នៅថ្ងៃទី២៣ ខែតុលា ឆ្នាំ២០២៣នេះ គឺជាខួប ៣២ឆ្នាំនៃកិច្ចព្រមព្រៀងសន្តិភាពទីក្រុងប៉ារីស ដែលធ្វើឡើងដើម្បីថែរក្សា និងការពារអធិបតេយ្យភាព ឯករាជ្យ បូរណភាព និងឯកភាពជាតិរបស់កម្ពុជា ក៏ដូចជាចូលរួមដល់សន្តិភាព និងសន្តិសុខក្នុងតំបន់និងអន្តរជាតិ។
អ្នកចូលរួមក្នុងការ ចុះហត្ថលេខាលើកិច្ចព្រមព្រៀងនេះ រួមមាន៖ កម្ពុជា (មាន៤ភាគី) និងតំណាងប្រទេសដទៃទៀតចំនួន ១៨ ព្រមទាំងអង្គការសហប្រជាជាតិផងដែរ។ ក្នុងនោះ៖
-ភាគីទាំង៤ របស់កម្ពុជារួមមាន៖ សម្តេច ហ៊ុន សែន តំណាងឱ្យរដ្ឋាភិបាលកម្ពុជា, ចលនាតស៊ូហ៊្វុនស៊ីនប៉ិច ដែលតំណាងដោយ សម្តេចព្រះ នរោត្តម សីហនុ និង សម្តេចក្រុមព្រះ នរោត្តម រណប្ញទ្ធិ, រណសិរ្សជាតិរំដោះប្រជាពលរដ្ឋខ្មែរ ដែលតំណាងដោយ លោក សឺន សាន និង ក្រុមចលនាកម្ពុជាប្រជាធិបតេយ្យ (ប៉ុលពត) តំណាងដោយ លោក ខៀវ សំផន។
-ប្រទេសទាំង១៨រួមមាន៖ ឥណ្ឌូណេស៊ី, បារាំង, អូស្ត្រាលី, ប្រ៊ុយណេ, កាណាដា, ចិន, អាមេរិក, ឥណ្ឌា, ជប៉ុន, ឡាវ, ម៉ាឡេស៊ី, ហ្វីលីពីន, អង់គ្លេស និងអៀរឡង់ខាងជើង, សិង្ហបុរី, ថៃ, អតីតសហភាពសូវៀត, វៀតណាម និងអតីតសហព័ន្ធយូហ្គោស្លាវី ៕
