លោក Roman Abramovich គឺជាមហាសេដ្ឋីរបស់រុស្ស៊ី និងជាម្ចាស់ក្លឹប Chelsea ផ្ទាល់តែម្ដង ដែលលោកបានទិញយក កាលពីឆ្នាំ២០០៣កន្លងទៅ ក្នុងតម្លៃ១៤០លានផោនប៉ុណ្ណោះ។
សេដ្ឋីលុយវាល់លានដុល្លារខាងលើនេះ ត្រូវបានគេដឹងថាកំពុងតែបញ្ជាទិញនាវាកម្សាន្តខ្នាតធំមួយគ្រឿងទៀតហើយ ដែលកំពុងតែសាងសង់ឡើងនៅប្រទេសអាល្លឺម៉ង់ ដែលមានតម្លៃដល់ទៅ៥០០លានអឺរ៉ូឯណោះ។ នាវាថ្មីមួយគ្រឿងនេះដែរ មានប្រវែងវែង និងធំជាងនាវាកម្សាន្តឯកជនធម្មតា ហើយក៏នឹងបំពាក់បច្ចេកវិទ្យាចុងក្រោយផងដែរ ដើម្បីធានាឱ្យបាននូវសុវត្ថិភាពរបស់លោក Roman។
នាវាថ្មីកំពុងសាងសង់នៅអាល្លឺម៉ង់ មិនទាន់មានដំណឹងផ្លូវការលម្អិត ពីនាវាដែលមានតែមួយគត់ លើលោកនេះទេ ប៉ុន្តែប្រភពជាច្រើន បានអះអាងថា វាត្រូវបានធ្វើឡើងឱ្យខុសប្លែកពីនាវាកម្សាន្តដទៃទៀត និងក្លាយជានាវាខ្លាំងបំផុត មានតែមួយគត់នៅលើលោក។ ជាមួយគ្នានោះ គេក៏ជឿថាលោក Roman នឹងបំពាក់ប្រព័ន្ធការពារមីស៊ីល និងគ្រឿងការពារខ្លួនលើនាវានេះមិនឱ្យខុសពីនាវាមុនរបស់លោកនោះទេ។
នាវាចាស់ របស់លោក Roman រំលឹកថាលោក Roman មាននាវាផ្ទាល់ខ្លួនមួយទៅហើយតម្លៃប្រមាណ៣០០លានផោន។ នាវាមួយនោះលោកបានទិញ នៅឆ្នាំ២០១០ ហើយបានបំពាក់បន្ថែមទៀត ជាមួយប្រព័ន្ធការពារ ដែនអាកាស និងមីស៊ីលរយៈចម្ងាយខ្លី។ នាវាកម្សាន្តនេះ មានកន្លែងចតឧទ្ធម្ភាគចក្របាន២គ្រឿង ទូកល្បឿនលឿន៣គ្រឿង និងមាននាវាមុជទឹក១ផងដែរ ដែលអាចមុជដល់ជម្រៅ៥០ម៉ែត្រ។ កញ្ចក់នៅលើនាវានេះ សុទ្ធតែការពារគ្រាប់ទាំងអស់ ។ ដោយឡែកសម្រាប់បន្ទប់វិញនៅលើនាវានេះ សុទ្ធតែលំដាប់ផ្កាយ៥ ទំនើបផុតលេខតែម្ដង ៕
