បងប្អូនភ្លោះ២រូបគឺលោក Sergio Ramalheiro និង Jorge Ramalheiro ដែលត្រូវបានគេស្គាល់ថា កំពូលអង្គរក្ស របស់ខ្សែប្រយុទ្ធ Cristiano Ronaldo ចាប់តាំងពីកីឡាកររូបនេះផ្លាស់មកកាន់ក្លឹប Manchester United មក កំពុងត្រូវអង្គភាពប៉ូលិសនៅប្រទេសព័រទុយហ្គាល់ ស៊ើបអង្កេតពាក់ព័ន្ធនឹងពួកគេទាំងពីរបានប្រព្រឹត្តិខុសច្បាប់ការងាររបស់អង្គភាព។ នេះបើយោងតាមសារព័ត៌មាន Observador ។
លោក Sergio និង Jorge ត្រូវបានគេស្គាល់ថា មានប្រវត្តិការងារធ្លាប់ជាទាហានស្ថិតក្នុងកងពិសេស និងធ្លាប់បញ្ជូនទៅសមរភូមិប្រទេសអាហ្វហ្គានីស្ថាន។ លុះក្រោយមក គេក៏បានមកបម្រើការងារជាប៉ូលិសក្នុងកងសន្តិសុខជាន់ខ្ពស់ ការពារសេដ្ឋី និងអ្នកធំ នៅក្នុងប្រទេសព័រទុយហ្គាល់។
បើតាមប្រភពដដែលនេះ បងប្អូនភ្លោះទាំង២រូបនេះបានសុំច្បាប់ឈប់សម្រាកពីអង្គភាព តែពួកគេបែរជាឃើញមុខមកធ្វើការងារជាកងអង្គរក្សផ្ទាល់ខ្លួនរបស់ Ronaldo ដោយមិនបានសុំច្បាប់ការងារពីអង្គភាពរបស់ពួកគេមកធ្វើការឲ្យកីឡាករនេះឲ្យបានត្រឹមត្រូវទេ។
ប្រសិនជាគេរកឃើញថា ពួកគេមកធ្វើការងារឲ្យ Ronaldo ដោយមិនបានសុំច្បាប់ពីអង្គភាពឲ្យបានត្រឹមត្រូវ នោះពួកគេអាចនឹងមានទោសទាន់នៅពេលត្រលប់ទៅកាន់ព័រទុយហ្គាល់ ព្រោះនៅប្រទេសព័រទុយហ្គាល់នេះ ប៉ូលិសនៅក្នុងកងអង្គរក្សត្រូវសុំសិទ្ធធ្វើការងារពីអង្គភាព ទោះជាខ្លួនសុំច្បាប់ឈប់សម្រាកពីអង្គភាព និងធ្វើការងារជាអ្នកការពារនៅកន្លែងផ្សេងក៏ដោយ។
បើតាមច្បាប់នេះ ចំពោះអ្នកជួលអង្គរក្ស ដែលគ្មានការអនុញ្ញាតពីអង្គភាពបែបនេះ ក៏ត្រូវមានទោសផងដែរ តែយ៉ាងណាចំពោះ Ronaldo ត្រូវបានគេដឹងថា មិនមានការពាក់ព័ន្ធដោយផ្ទាល់នឹងរឿងខុសច្បាប់អ្វីនេះឡើយ៕
ប្រភព៖sabay
