ដោយ៖លី ភីលីព
កាតា៖ នេះបើយោងតាមការចេញផ្សាយ ពីគេហទំព័រឌៀលីម៉ែលបានប្រាប់ឲ្យដឹងថា អគ្គីភ័យដ៏ធំមួយបានឆាបឆេះនៅទីក្រុង Lusail នៃការប្រកួតបាល់ទាត់ពិភពលោក ក្នុងប្រទេសកាតា ដោយមានផ្សែងខ្មៅ ហុយឡើងលើមេឃក្បែរ ភូមិអ្នកគាំទ្រមួយរបស់ប្រទេស។
ប៉មដ៏ធំនៃផ្សែងអាចត្រូវបានគេមើលឃើញថា បានហក់ឡើងពាសពេញភូមិកង្ហារ ដែលមានឈ្មោះថា Qetaifan Island North ទោះបីជាភ្លើងបានមក ពីណានៅមិនទាន់ច្បាស់នៅឡើយ។ អាជ្ញាធរបាននិយាយថា កម្លាំងការពារជនស៊ីវិលបានគ្រប់គ្រងភ្លើងឆេះអគារកំពុងសាងសង់ ដោយមិនមានអ្នករងរបួសឡើយ។
ពួកគេបានស្វែងរកការធានាដល់អ្នកគាំទ្រ និងអ្នកស្រុកក្នុង Tweet មួយដែលបានបង្ហោះបន្ទាប់ពីម៉ោង ១០ ព្រឹក។ វីដេអូដែលបានបង្ហោះលើបណ្តាញសង្គមបានបង្ហាញថា ភ្លើងត្រូវបានគេមើលឃើញពីចម្ងាយរាប់គីឡូម៉ែត្រ។
រូបភាពបង្ហាញពីភូមិដែលបង្កើតឡើង ដោយតង់ផ្ទាំងក្រណាត់នៅក្នុងទីក្រុង Lusail ដែលរដ្ឋាភិបាលកាតាបានចំណាយប្រាក់រាប់លានផោនសាងសង់ មុនពេលការប្រកួតបាល់ទាត់ពិភពលោកចាប់ផ្តើម នៅក្នុងប្រទេសកាលពីសប្តាហ៍មុន។
វាគឺជាឧប្បត្តិហេតុចុងក្រោយបង្អស់ នៃការប្រកួតដែលពោរពេញដោយរឿងអាស្រូវត្រូវបានគេឃើញ ការហាមប្រាមការពិសាស្រានៅនាទីចុងក្រោយ លទ្ធផលដែលមិននឹកស្មានដល់នៅលើទីលាន និងការរិះគន់លើច្បាប់ដ៏តឹងរឹង របស់ប្រទេសស្តីពីអ្នកស្រលាញ់ភេទដូចគ្នា និងសិទ្ធិស្ត្រី៕
