កូរ៉េខាងត្បូង៖ក្រុមហ៊ុនផ្សាយព័ត៌មានកូរ៉េ JTBC បាននិយាយកាលពីថ្ងៃពុធថា ខ្លួននឹងផ្សាយគ្រប់វគ្គនៃព្រឹត្តិការណ៍ FIFA World Cup ដោយគ្មានការរំខាន ដោយបដិសេធរបាយការណ៍ ប្រព័ន្ធផ្សព្វផ្សាយអំពីលទ្ធភាពបែបនេះ ចំពេលមានវិបត្តិសាច់ប្រាក់ នេះយោងតាមការចេញផ្សាយពីគេហទំព័រ Korea Times ។
ក្រុមហ៊ុនផ្សាយព័ត៌មានបាននិយាយក្នុងសេចក្តីថ្លែងការណ៍មួយថា បន្ថែមពីលើការប្រកួតដែលពាក់ព័ន្ធនឹងក្រុមជម្រើសជាតិកូរ៉េខាងត្បូង រហូតដល់ដំណាក់កាលចុងក្រោយ នៃការប្រកួត យើងនឹងនាំមកនូវការផ្សាយដ៏រស់រវើកនៃព្រឹត្តិការណ៍ World Cup” ដោយស្នើសុំឲ្យអ្នកទស្សនាកុំឲ្យ យល់ច្រឡំដោយព័ត៌មានមិនត្រឹមត្រូវ។
សេចក្តីថ្លែងការណ៍នេះបានធ្វើឡើងជាការឆ្លើយតបទៅនឹងរបាយការណ៍មួយដោយប្រព័ន្ធផ្សព្វផ្សាយជប៉ុន JNN ដែលបង្កើនលទ្ធភាពនៃការរំខានក្នុងការផ្សាយព្រឹត្តិការណ៍ World Cup របស់ JTBC ដោយអះអាងថា ក្រុមហ៊ុនផ្សាយព័ត៌មានកូរ៉េខាងត្បូងមិនទាន់បានបង់ថ្លៃផ្សាយពេញលេញទៅ FIFA នៅឡើយទេ។
JTBC ទទួលបានសិទ្ធិផ្សាយផ្តាច់មុខក្នុងប្រទេសកូរ៉េខាងត្បូងសម្រាប់ព្រឹត្តិការណ៍កីឡាអូឡាំពិករដូវក្តៅ និងរដូវរងា ឆ្នាំ ២០២៦-២០៣២ និងសម្រាប់ព្រឹត្តិការណ៍បាល់ទាត់ ពិភពលោកចាប់ពីឆ្នាំ ២០២៦-២០៣០។ កាលពីខែមេសា ខ្លួនបានឈានដល់កិច្ចព្រមព្រៀង ជាមួយក្រុមហ៊ុនផ្សាយសាធារណៈ KBS ដើម្បីផ្សាយព្រឹត្តិការណ៍បាល់ទាត់ពិភពលោកដែលកំពុងដំណើរការរួមគ្នា។
កាលពីដើមខែនេះ JTBC និងក្រុមហ៊ុនបុត្រសម្ព័ន្ធចំនួនបួនផ្សេងទៀត របស់ក្រុមហ៊ុន JoongAng Group រួមទាំង JoongAng Holdings និង Megabox JoongAng បានដាក់ពាក្យ ស្នើសុំនីតិវិធីស្តារនីតិសម្បទាដែលដឹកនាំដោយតុលាការ ចំពេលមានបញ្ហាសាច់ប្រាក់ កាន់តែអាក្រក់ទៅៗក្នុងក្រុមហ៊ុនមេរបស់ពួកគេ៕
