ទីក្រុងហ្សឺណែវ៖ គណៈកម្មាធិការអូឡាំពិកអន្តរជាតិ បានរិះគន់យ៉ាងចាស់ដៃថា ប្រទេសរុស្ស៊ីបានរំលោភលើ បទឈប់បាញ់អូឡាំពិក ជាមួយនឹងការវាយប្រហាររបស់ខ្លួន លើអ៊ុយក្រែន ហើយបាននិយាយថា ខ្លួនកំពុងសម្របសម្រួល ជំនួយមនុស្សធម៌ ដល់អត្តពលិកអ៊ុយក្រែន តាមដែលអាចធ្វើទៅបាន យោងតាមការចេញផ្សាយ ពីគេហទំព័រជប៉ុនធូដេ។
ប៉ុន្មានម៉ោងបន្ទាប់ពីទីក្រុងមូស្គូ បានចាប់ផ្តើមលុកលុយប្រទេសជិតខាង ដែលគាំទ្រលោកខាងលិចរបស់ខ្លួន IOC បាននិយាយនៅក្នុងសេចក្តីថ្លែងការណ៍ថា ខ្លួនថ្កោលទោសយ៉ាងខ្លាំង ចំពោះការរំលោភលើកិច្ចព្រមព្រៀង អូឡាំពិកដោយរដ្ឋាភិបាលរុស្ស៊ី។
វាបានចង្អុលបង្ហាញថា រដ្ឋសមាជិកទាំង ១៩៣ របស់អង្គការសហប្រជាជាតិ បានយល់ព្រមកាលពីខែធ្នូឆ្នាំមុន ចំពោះបទឈប់បាញ់ ជាសាកលចាប់ផ្តើម ៧ថ្ងៃមុន ពេលចាប់ផ្តើមការប្រកួត កីឡាអូឡាំពិក នៅទីក្រុងប៉េកាំង នៅថ្ងៃទី ៤ ខែកុម្ភៈ និងបញ្ចប់៧ថ្ងៃបន្ទាប់ពី ការបិទការប្រកួតកីឡាប៉ារ៉ាឡាំពិក នៅថ្ងៃទី ១៣ ខែមីនា។
ប៉ុន្តែនៅព្រឹកថ្ងៃព្រហស្បតិ៍ ប្រធានាធិបតីរុស្ស៊ី វ្ល៉ាឌីមៀ ពូទីន បានបើកការលុកលុយ ពេញមួយទឹកដីអ៊ុយក្រែន ដោយបានសម្លាប់មនុស្សរាប់សិបនាក់ និងបង្ខំមនុស្សរាប់រយនាក់ ឲ្យភៀសខ្លួនអស់មួយជីវិត។ ប្រធាន IOC លោក Thomas Bach បញ្ជាក់សារជាថ្មី នូវការអំពាវនាវរបស់គាត់ ដើម្បីសន្តិភាព ដែលលោកបានថ្លែង នៅក្នុងសុន្ទរកថារបស់លោក នៅពិធីបើក និងពិធីបិទការប្រកួតកីឡាអូឡាំពិក។
IOC ក៏បាននិយាយថា បន្ទាប់ពីព្រឹត្តិការណ៍ថ្មីៗ វាមានការព្រួយបារម្ភយ៉ាងខ្លាំង អំពីសុវត្ថិភាពនៃសហគមន៍ អូឡាំពិកនៅអ៊ុយក្រែន។ អង្គការនេះបាននិយាយថា បានបង្កើតក្រុមការងារមួយ ដើម្បីតាមដានស្ថានការណ៍ យ៉ាងដិតដល់ និងសម្របសម្រួលជំនួយមនុស្សធម៌ ដល់សមាជិក នៃសហគមន៍អូឡាំពិកនៅអ៊ុយក្រែន តាមដែលអាចធ្វើទៅបាន៕ ដោយ៖លី ភីលីព
