ភ្នំពេញ៖សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានផ្ញើសារអបអរសាទរក្រុមបាល់ទាត់គោព្រៃកម្ពុជាអាយុក្រោម២២ឆ្នាំ ក្រោយក្រុមនេះបានយកឈ្នះលើក្រុមបាល់ទាត់ជម្រើសជាតិម៉ាឡេស៊ីអាយុក្រោម២២ឆ្នាំក្នុងលទ្ធផល៣ទល់នឹង១នៃប្រកួតកីឡាSEA GAMES 2019 លើកទី៣០នៅហ្វីលីពី។
សារសម្តេចក្រឡាហោម ស ខេង មានន័យថា បងប្អូនជនរួមជាតិជាទីគោរពស្រលាញ់ដ៏ជ្រាលជ្រៅ នៅថ្ងៃនេះ ខ្ញុំក៏មិនខុសពីបងប្អូនជនរួមជាតិដែរ គឺយើងទាំងអស់គ្នាពិតជាមានសេចក្ដីរំភើបរីករាយ និងមោទនភាពយ៉ាងក្រៃលែង ចំពោះក្រុមបាល់ទាត់ជម្រើសជាតិកម្ពុជាអាយុក្រោម២២ ឆ្នាំ ដែលបានខិតខំប្រឹងប្រែងប្រកួតយកជ័យជំនះក្នុងលទ្ធផល៣ទល់នឹង១លើក្រុមជម្រើសជាតិអាយុក្រោម២២ឆ្នាំរបស់ម៉ាឡេស៊ី ក្នុងព្រឹត្តិការណ៍កីឡាស៊ីហ្គេម នៅប្រទេសហ្វីលីពីន ។
តាមរយៈលទ្ធផលនេះ ក្រុមគោព្រៃកម្ពុជាអាយុក្រោម២២ឆ្នាំ បានបង្កើតទំព័រប្រវត្តិសាស្ត្រថ្មីនៃវិស័យបាល់ទាត់កម្ពុជាក្នុងក្របខណ្ឌព្រឹត្តិការណ៍កីឡាស៊ីហ្គេមដែលតាំងពីឆ្នាំ១៩៩៥មក ក្រុមបាល់ទាត់ជាតិយើងពុំដែលបានឡើងទៅដល់វគ្គពាក់កណ្ដាលផ្ដាច់ព្រាត់នៅ ដូចថ្ងៃនេះទេ។
ខ្ញុំសូមកោតសរសើរដល់ថ្នាក់ដឹកនាំប្រតិភូកីឡា គ្រូបង្វឹក ក្រុមជំនួយ ពិសេសក្រុមកីឡាករបាល់ទាត់ជម្រើសជាតិយើងទាំងអស់ចំពោះលទ្ធផលដ៏គាប់ប្រសើរនេះ និងសូមអរគុណដល់ជនរួមជាតិទាំងអស់ដែលតែងតែផ្ដល់ការគាំទ្រដល់ក្រុមជម្រើសជាតិ។
ខ្ញុំក៏សូមជូនពរក្រុមបាល់ទាត់ជម្រើសជាតិអាយុក្រោម២២ឆ្នាំរបស់កម្ពុជាយើងឲ្យទទួលបានជោគជ័យនៅក្នុងការប្រកួតវគ្គ៤ក្រុមចុងក្រោយនាពេលខាងមុខនេះ៕ដោយ៖លី ភីលីព
