អាមេរិក ៖ នេះបើយោងតាមការ ចេញផ្សាយពីគេហទំព័រ ឌៀលីម៉ែល បាននិយាយថា ណាសាបានជំហានមួយ ខិតទៅជិតការដាក់ស្បែកជើង មនុស្សនៅលើភព ព្រះអង្គារ បន្ទាប់ ពីសភាបានអនុម័តច្បាប់អនុញ្ញាតដំបូង សម្រាប់ទីភ្នាក់ងារអវកាស អាមេរិកក្នុងរយៈពេល ៥ ឆ្នាំរួមបញ្ចូល ទាំងការផ្តល់មូលនិធិ សម្រាប់ បេសកកម្ម Artemis ដើម្បីមិនត្រឹមតែបន្តការងាររបស់ខ្លួនទៅកាន់ព្រះច័ន្ទប៉ុណ្ណោះទេ ប៉ុន្តែថែមទាំងឡើងទៅកាន់ ភពក្រហមផងដែរ ។
សម្រាប់ឯកសារមាន ១,០៥៤ទំព័រគឺជាច្បាប់ អនុញ្ញាតការគ្រប់គ្រង អាកាសចរណ៍ជាតិ និងអវកាសឆ្នាំ២០២២ រួមបញ្ចូលកម្មវិធីព្រះច័ន្ទ ទៅកាន់ភពព្រះអង្គារ ត្រូវតែបង្កើតឡើង ១២០ ថ្ងៃបន្ទាប់ពីសកម្មភាពនេះ ចូលជាធរមាន ។ នេះរាប់បញ្ចូលទាំងការ អនុវត្តដំណើរការនានា ដើម្បីធានាថា មូលដ្ឋានព្រះច័ន្ទ និង ស្ថានីយគោចរត្រូវបានសាងសង់ យានអវកាស ត្រូវបានបង្កើតឡើង និងការរចនាសម្រាប់ ជម្រករបស់មនុស្ស នៅលើភពអង្គារកំពុងដំណើរការ ។
ទោះជាយ៉ាងណាក៏ដោយ ច្បាប់នេះមិនបានបញ្ជាក់ អំពីចំនួនទឹកប្រាក់ពិតប្រាកដ នៃមូលនិធិបានកំណត់ ដែលត្រូវផ្តល់ទៅឲ្យអង្គការ អវកាសណាសា ដើម្បីធ្វើឲ្យវាកើតឡើង ទាំងអស់នោះទេ ។ ពេលវេលាចុងក្រោយ សភាបានអនុម័តការ ផ្តល់មូលនិធិសម្រាប់អង្គការណាសា គឺត្រឡប់មកវិញនៅឆ្នាំ ២០១៧ ភ្ជាប់មកជាមួយច្បាប់អនុញ្ញាត ការផ្លាស់ប្តូររបស់អង្គការណាសា ។
ទីភ្នាក់ងារអវកាសអាមេរិក បានទទួលមូលនិធិចំនួន ១៩.៥ពាន់លានដុល្លារ ដោយភាគច្រើន នៃវាត្រូវបានកំណត់ សម្រាប់ភាពជាដៃគូសាធារណៈ និងឯកជនជាមួយក្រុម ហ៊ុនអាកាសចរណ៍ពាណិជ្ជកម្ម និងដើម្បីចាប់ផ្តើមរៀបចំការ ធ្វើដំណើរទៅកាន់ភពព្រះអង្គារ ៕
