BEIRUT ៖ មន្ត្រីលីបង់ បាននិយាយកាលពីថ្ងៃអង្គារថា មហាសេដ្ឋីរថយន្ត លោក Carlos Ghosn បានដាក់ពាក្យប្តឹង ក្រុមហ៊ុន Nissan និងបុគ្គលឲ្យសងជំងឺចិត្ត លោកចំនួន ១ ពាន់លានដុល្លារនៅទីក្រុង Beirut ជុំវិញការជាប់ពន្ធនាគារ របស់លោកក្នុងប្រទេសជប៉ុន ហើយអ្វីដែលលោកនិយាយថា ជាព័ត៌មាន មិនពិតបានរីករាលដាល ប្រឆាំងនឹងលោក ។
យោងតាមក្រុមមន្ត្រីថា បណ្ដឹងរបស់លោក Ghosn បានចោទប្រកាន់ក្រុមហ៊ុន Nissan និង បុគ្គលពីបទបរិហារកេរ្តិ៍ និងពីបទបង្កើតការចោទ ប្រកាន់ប្រឆាំងនឹងលោក ទីបំផុតបានដាក់លោក ឲ្យជាប់គុកក្នុងប្រទេសជប៉ុន។ មន្ត្រីតុលាការបាននិយាយ ក្នុងលក្ខខណ្ឌសុំមិនបញ្ចេញឈ្មោះថា ពាក្យបណ្ដឹងត្រូវបានដាក់ កាលពីខែមុន ដើម្បីពិភាក្សាអំពីករណីនេះ។ ក្រុមមន្ត្រីមិនបានកំណត់អត្តសញ្ញាណ បុគ្គលដែលលោក Ghosn កំពុងចោទប្រកាន់នោះទេ ។
លោក Ghosn ត្រូវបានចាប់ខ្លួន នៅប្រទេសជប៉ុនកាលខែវិច្ឆិកា ឆ្នាំ២០១៨ ក្រោមការចោទប្រកាន់ពីបទរំលោភលើទំនុកចិត្ត ការប្រើប្រាស់ទ្រព្យសម្បត្តិ របស់ក្រុមហ៊ុនដោយខុសឆ្គង ដើម្បីផលប្រយោជន៍ផ្ទាល់ខ្លួន និងបំពានច្បាប់ ស្តីពីមូលបត្រ ដោយមិនបង្ហាញពីសំណងរបស់លោកទាំងស្រុង។
យោងតាមចៅក្រម Sabbouh Suleiman ស្ថិតនៅការិយាល័យរដ្ឋ អាជ្ញាក្រុង Beirut កាលបរិច្ឆេទសវនាការ ក្នុងសំណុំរឿងនេះត្រូវបានកំណត់ សម្រាប់ខែកញ្ញា ។ មន្ត្រីតុលាការបាននិយាយ ទៅកាន់សារព័ត៌មាន The Associated Press បាននិយាយថា Nissan និងបុគ្គលជាប់ចោទ ត្រូវបានគេរំពឹងថា នឹងបញ្ជូនអ្នកតំណាងទៅទីក្រុង Beirut ឬដាក់ឈ្មោះមេធាវីលីបង់ ដើម្បីតំណាងពួកគេ ។
លោក Ghosn អាយុ ៦៩ ឆ្នាំ ជាអតីតប្រធានក្រុមហ៊ុន Nissan និង Renault អស់រយៈពេល ២ ទសវត្សរ៍ បាននិយាយម្តងហើយម្តងទៀតថា លោកគ្មានកំហុសទេ ។ នៅខែធ្នូ ឆ្នាំ ២០១៩ លោកបាន លោតចេញពីការធានា នៅប្រទេសជប៉ុន ក្នុងការរត់គេចខ្លួនដោយហ៊ានលាក់ខ្លួន ក្នុងប្រអប់មួយដែលមានវិញ្ញាណនៅលើ យន្តហោះឯកជនមួយចេញពីប្រទេស ។
ព្រះរាជអាជ្ញាក្នុងប្រទេសជប៉ុន បានចោទប្រកាន់ជនជាតិអាមេរិក ៣ នាក់ពីបទជួយលោក Ghosn ឲ្យរត់គេចពីប្រទេស។ ឥឡូវនេះលោករស់នៅ ក្នុងប្រទេសលីបង់ ដែលមិនមានសន្ធិសញ្ញា ធ្វើបត្យាប័នជាមួយប្រទេសជប៉ុន ហើយមិនធ្វើបត្យាប័នពលរដ្ឋរបស់ខ្លួនឡើយ។ ក្រុមហ៊ុន Renault និង Nissan ទាំងពីរបានឃ្លាតឆ្ងាយ ពីរឿងអាស្រូវ Ghosn ។ Ghosn មានសញ្ជាតិនៅលីបង់ បារាំង និងប្រេស៊ីល ។
ប្រទេសលីបង់បានទទួលការជូនដំណឹងចំនួនបីពី Interpol ដោយផ្អែកលើដីកាចាប់ខ្លួន នៅក្នុងប្រទេសជប៉ុន និងប្រទេសបារាំងសម្រាប់លោក Ghosn ។ នៅប្រទេសបារាំង លោកកំពុងប្រឈមមុខ នឹងបញ្ហាផ្លូវច្បាប់ជាច្រើន រួមទាំងការគេចពន្ធ និងការចោទប្រកាន់ពីការ លាងលុយកខ្វក់ ការក្លែងបន្លំ និងការប្រើប្រាស់ទ្រព្យសម្បត្តិ របស់ក្រុមហ៊ុនខុសពេលកំពុងកាន់តំណែងជាសម្ព័ន្ធភាព Renault-Nissan ៕
