អាមេរិក ៖ កាសែត Economic Times បានរាយការណ៍ កាលពីថ្ងៃចន្ទថា អាជ្ញាធរសហរដ្ឋអាមេរិក បានបង្កកការផ្ទេរប្រាក់ ដែលមានតម្លៃប្រហែល ៣៦ លានដុល្លារ ដោយក្រុមហ៊ុនជាកម្មសិទ្ធិ របស់អ្នកលក់ពេជ្រឥណ្ឌា ជុំវិញការចោទប្រកាន់ពីការនាំចូលពីប្រទេសរុស្ស៊ី យោងតាមការចេញផ្សាយពីគេហទំព័រ RT ។
ការិយាល័យគ្រប់គ្រងទ្រព្យ សកម្មបរទេស (OFAC) នៃក្រសួងរតនាគារ សហរដ្ឋអាមេរិក តាមសេចក្តីរាយការណ៍ បានកំណត់គោលដៅ ក្រុមហ៊ុនបុត្រសម្ព័ន្ធ នៃក្រុមហ៊ុនពេជ្រឥណ្ឌា ដែលបានចុះបញ្ជី ក្នុងប្រទេសអារ៉ាប់រួម ។ ការទូទាត់ប្រាក់ដុល្លារ ដោយក្រុមហ៊ុនមានមូលដ្ឋាន នៅអារ៉ាប់រួម ត្រូវបានជាប់គាំង ដោយសារតែការសង្ស័យថា ការផ្គត់ផ្គង់របស់ពួកគេ មានប្រភពដើមពីរុស្ស៊ី ឬថា ពួកគេមានការវិនិយោគ និងទំនាក់ទំនងផ្សេងទៀត ជាមួយអ្នករុករករ៉ែរុស្ស៊ី និងអង្គភាពដែលមានទណ្ឌកម្ម ។
នេះបើយោងតាមប្រធាន Vipul Shah ត្រូវបានដកស្រង់ ដោយប្រព័ន្ធផ្សព្វផ្សាយថា ក្រុមប្រឹក្សាលើកកម្ពស់ ការនាំចេញត្បូង និងគ្រឿងអលង្ការ (GJEPC) បានដោះស្រាយបញ្ហានេះ ជាមួយក្រសួងពាណិជ្ជកម្ម និងស្ថានទូតឥណ្ឌា ប្រចាំប្រទេសអារ៉ាប់រួម ។
លោក Shah បានបន្តថា យើងក៏កំពុងព្យាយាមពន្យល់ដល់ OFAC ថាការទូទាត់ត្រូវបានធ្វើឡើង ចំពោះអង្គភាពដែលមិនមានទណ្ឌកម្ម និងសូម្បីតែអង្គភាព រុស្ស៊ីមួយចំនួនផងដែរ មុនពេលទណ្ឌកម្មចូលជាធរមាន និង មានការនាំចូលពេជ្រផ្ទាល់ ពីរុស្ស៊ីតិចតួចណាស់។
នៅខែឧសភា មេដឹកនាំ G7 បានសន្យាថា នឹងដាក់កម្រិត លើការធ្វើពាណិជ្ជកម្ម លើត្បូងពេជ្រត្រូវបានជីក កែច្នៃ ឬផលិតនៅប្រទេសរុស្ស៊ី ក្នុងកិច្ចខិតខំប្រឹងប្រែង ដើម្បីកាត់បន្ថយប្រាក់ចំណូល របស់ទីក្រុងម៉ូស្គូ ។ សេចក្តីថ្លែងការណ៍រួមមួយ ក្រុមប្រទេសអភិវឌ្ឍន៍លោកខាងលិចបាននិយាយថា ខ្លួននឹងទប់ស្កាត់ការជួញដូរពេជ្ររុស្ស៊ីតម្លៃ ៤.៥ ពាន់លានដុល្លារ ដោយប្រើវិធីសាស្រ្តរួមទាំងការ តាមដានបច្ចេកវិទ្យាខ្ពស់៕
ដោយ៖លី ភីលីព
