អាមេរិក៖ យោងតាមការចេញផ្សាយពីគេហទំព័រ VOA បានប្រាប់ឲ្យដឹងថា ក្រសួងពាណិជ្ជកម្មអាមេរិក កាលពីថ្ងៃអង្គារបានរឹតបន្តឹងការគ្រប់គ្រងការនាំចេញរបស់ខ្លួន ដើម្បីរារាំងប្រទេសចិនពីការទទួលបានបន្ទះឈីបកុំព្យូទ័រកម្រិតខ្ពស់ដែលវាអាចប្រើបានដើម្បីជួយអភិវឌ្ឍមីស៊ីលលឿនជាងសំឡេង និងបញ្ញាសិប្បនិម្មិត។
រដ្ឋមន្ត្រីក្រសួងពាណិជ្ជកម្ម Gina Raimondo បាននិយាយថា ការគ្រប់គ្រងថ្មីដោយមានបំណងការពារបច្ចេកវិទ្យាដែលមានសុវត្ថិភាពជាតិច្បាស់លាស់ ឬផលប៉ះពាល់សិទ្ធិមនុស្ស។ ការគ្រប់គ្រងថ្មីអាចបង្កើនភាពតានតឹងរវាងសហរដ្ឋអាមេរិក ដែលជាមហាអំណាចសេដ្ឋកិច្ចធំជាងគេលើពិភពលោក និងលេខ២របស់ប្រទេសចិន។
កិច្ចពិភាក្សានាពេលថ្មីៗនេះក្នុងរយៈពេលជាច្រើនខែជាមួយមន្ត្រីជាន់ខ្ពស់អាមេរិក ទីក្រុងប៉េកាំងបានអំពាវនាវឲ្យមានសកម្មភាពជាក់ស្តែងពីទីក្រុងវ៉ាស៊ីនតោន ដើម្បីធ្វើឲ្យប្រសើរឡើងនូវទំនាក់ទំនងរវាងប្រទេសទាំង២ ទោះបីជាមន្ត្រីសហរដ្ឋអាមេរិកបានព្រមានថាច្បាប់នាំចេញថ្មីកំពុងស្ថិតក្នុងការបញ្ចប់ក៏ដោយ។
លោក Raimondo បានប្រាប់អ្នកសារព័ត៌មានថា ភាគច្រើននៃការលក់វត្ថុធាតុដើមទៅឲ្យប្រទេសចិន នឹងនៅតែមិនមានការរឹតបន្តឹង ប៉ុន្តែនៅពេលយើងកំណត់អត្តសញ្ញាណសន្តិសុខជាតិ ឬការគំរាមកំហែងសិទ្ធិមនុស្ស យើងនឹងចាត់វិធានការយ៉ាងម៉ឺងម៉ាត់ និងរួមជាមួយនឹងសម្ព័ន្ធមិត្តរបស់យើង។
នាយកដ្ឋានពាណិជ្ជកម្មបាននិយាយថា ការរឹតបន្តឹងថ្មីបានកើតឡើងបន្ទាប់ពីការពិគ្រោះយោបល់ជាមួយក្រុមហ៊ុនផលិតបន្ទះឈីបរបស់សហរដ្ឋអាមេរិក និងធ្វើការវិភាគផ្នែកបច្ចេកវិទ្យា។ ការត្រួតពិនិត្យថ្មីធ្វើឲ្យមានការត្រួតពិនិត្យការលក់បន្ទះសៀគ្វីដែលនៅតែអាចប្រើសម្រាប់គោលដៅយោធា បើទោះបីជាពួកគេអាចមិនបំពេញតាមកម្រិតជាក់លាក់សម្រាប់ដែនកំណត់ពាណិជ្ជកម្មក៏ដោយ។
សហរដ្ឋអាមេរិកបាននិយាយថា ការនាំចេញបន្ទះឈីបក៏អាចត្រូវបានដាក់កម្រិតចំពោះក្រុមហ៊ុនដែលមានទីស្នាក់ការនៅទីក្រុងម៉ាកាវ ទឹកដីចិន ឬប្រទេសផ្សេងទៀតស្ថិតនៅក្រោមការហ៊ុមព័ទ្ធអាវុធរបស់សហរដ្ឋអាមេរិក ដើម្បីរារាំងពួកគេមិនឲ្យគេចផុតពីការគ្រប់គ្រង និងការផ្តល់បន្ទះសៀគ្វីដល់ប្រទេសចិន៕ ដោយ៖លី ភីលព
