ចិន ៖ យោងតាមការ ចេញផ្សាយ ពីគេហទំព័រឆៃណាឌៀលី បានប្រាប់ឲ្យដឹងថា សមាជិកនាវិក នៃបេសកកម្មអវកាស Shenzhou 7 បាននិយាយ អំពីការហ្វឹកហ្វឺន ការត្រៀមលក្ខណៈ និងទំនុកចិត្តរបស់ពួកគេ មុនពេលការបាញ់បង្ហោះ ពីមជ្ឈមណ្ឌលបាញ់ បង្ហោះផ្កាយរណប Jiuquan នៅវាលខ្សាច់ Gobi ភាគពាយ័ព្យប្រទេសចិន ។
ថ្លែងទៅកាន់ប្រព័ន្ធ ផ្សព្វផ្សាយកាលពីថ្ងៃពុធ វរសេនីយ៍ឯក Tang Hongbo មេបញ្ជាការ នៃបេសកកម្ម Shenzhou XVIIបានប្រាប់អ្នកសារព័ត៌មានថា ខណៈក្រុមរបស់លោក នឹងគ្រាន់តែជានាវិកទី២ប៉ុណ្ណោះ ស្នាក់នៅក្នុងស្ថានីយអវកាស Tiangong បន្ទាប់ពីវាត្រូវបាន បញ្ចប់កាលពីចុងឆ្នាំមុន។ មានភារកិច្ចធ្វើពិសោធន៍វិទ្យាសាស្ត្រ និងការធ្វើតេស្តបច្ចេកវិទ្យាមួយចំនួនធំ ។
ការហ្វឹកហ្វឺនយ៉ាងលំបាក នៅលើដីគឺជាមធ្យោបាយតែមួយគត់ សម្រាប់ភាពជោគជ័យ នៃបេសកកម្ម របស់យើងនៅក្នុងលំហ ដើម្បីរៀបចំ សម្រាប់កិច្ចការរបស់យើង ពួកយើងមិនបានលះបង់ការខិតខំប្រឹងប្រែង ក្នុងការសិក្សាទ្រឹស្តី នីតិវិធីជាក់ស្តែង និងការធ្វើសមយុទ្ធ និងបង្កើនជំនាញរបស់យើង ។
លោកបានបន្តថា យើងបានផ្តោតលើកិច្ចការវិទ្យាសាស្ត្រ និងបច្ចេកវិទ្យាក្នុងវិស័យជាច្រើន ដូចជាការស្រាវជ្រាវសម្ភារ ដែលមានមូលដ្ឋានលើលំហ រូបវិទ្យាជាមូលដ្ឋាននៅបរិស្ថានមីក្រូទំនាញ និងវិទ្យាសាស្ត្រជីវិត និងបច្ចេកវិទ្យាជីវសាស្រ្ត ។
សមាជិកនាវិក បានចំណាយពេលវេលា និងថាមពលជាច្រើនដើម្បីស្គាល់ខ្លួនឯងជាមួយនឹងការគ្រប់គ្រងស្ថានីយ៍អវកាស ការដើរលំហ និងជំនាញថែទាំសុខភាព ជាពិសេសនីតិវិធីពាក់ព័ន្ធនឹង ការឆ្លើយតបជាបន្ទាន់ និងការដោះស្រាយការខុសប្រក្រតី នេះបើយោង តាមមេបញ្ជាការបេសកកម្ម ។
លោក Tang បានពន្យល់ថា វាស្ថិតនៅក្នុងការពិចារណា លើការពិតដែលថា តែងតែមានហានិភ័យ និងគ្រោះថ្នាក់នៅក្នុងលំហ ទាមទារឲ្យអវកាសយានិក អាចចាត់វិធានការបានយ៉ាងរហ័ស និងត្រឹមត្រូវ ។
លោកវរសេនីយ៍ឯកបានបន្ថែមថា ក្នុងរយៈពេល ២ ឆ្នាំមកនេះ ចាប់តាំងពីលោកត្រឡប់ពីបេសកកម្ម Shenzhou XII រយៈពេលបីខែមក លោកបានប្រណាំងប្រជែងនឹងនាឡិកា ដើម្បីសិក្សាចំណេះដឹងថ្មីៗ និងពង្រឹងជំនាញរបស់ខ្លួន ដើម្បីត្រៀមខ្លួនសម្រាប់ជើងហោះហើរ បន្ទាប់របស់លោក។
លោកបានកត់សម្គាល់ថា ក្នុងនាមជាមេបញ្ជាការបេសកកម្ម ខ្ញុំមានទំនួលខុសត្រូវក្នុងការធ្វើឱ្យការហោះហើរនេះ ទទួលបានជោគជ័យ។ ខ្ញុំមានទំនុកចិត្ត ការប្តេជ្ញាចិត្ត និងសមត្ថភាពក្នុងការធ្វើការជាមួយសហការីទាំងពីរ របស់ខ្ញុំដើម្បីបំពេញបេសកកម្មរបស់យើង ៕
ដោយ៖លី ភីលីព
