អាមេរិក ៖ សារព័ត៌មានជាច្រើនបានរាយការណ៍ដោយដកស្រង់ឯកសារ និងគណនីសាក្សីបានប្រាប់ឲ្យដឹងថា វិស្វករ Software របស់ក្រុមហ៊ុនផលិតរថយន្តយក្សអាមេរិក Tesla ម្នាក់បានទទួលរងរបួស បន្ទាប់ពីលោកត្រូវបានវាយដំដោយមនុស្សយន្តផលិតនៅ Gigafactory នៃរដ្ឋតិចសាស់ របស់ក្រុមហ៊ុននេះ ។
ដោយព័ត៌មានលម្អិតលើរបាយការណ៍ របួសដែលទទួលបានដោយ Daily Mail ឧប្បត្តិហេតុបានកើតឡើងនៅឆ្នាំ ២០២១ នៅកន្លែងធំទូលាយ របស់ក្រុមហ៊ុន Tesla ក្នុងទីក្រុង Austin ជាកន្លែងដែលវិស្វករ មិនបញ្ចេញឈ្មោះម្នាក់កំពុងព្យាយាម ផ្តល់សេវាកម្មមនុស្សយន្តស្វ័យប្រវត្តិ ដែលរចនាម៉ូដគ្រឿងបន្លាស់ រថយន្តពីបំណែកនៃអាលុយមីញ៉ូម។
របាយការណ៍របួសបាននិយាយថា ម៉ាស៊ីនជាច្រើនត្រូវបានបិទសម្រាប់ការងារថែទាំ មនុស្សយន្តមួយបានលោតចូលសកម្មភាពដោយមិននឹកស្មានដល់ ដោយខ្ទាស់វិស្វករទៅនឹងផ្ទៃមួយ មុនពេលរុញក្រញ៉ាំរបស់វាវាយប្រហារ មកលើខ្លួនរបស់លោក ហើយបង្ហូរឈាមចេញពីខ្នង និងដៃរបស់លោក។ ព័ត៌មានបន្ថែមថា កម្មករបានបន្សល់ទុក ស្នាមឈាមនៅពីក្រោយលោក បន្ទាប់ពីបានដោះលែងខ្លួនឯង។ លោកក៏បានរងរបួសដាច់ដៃឆ្វេងដែរ។
ខណៈសាក្សី ដែលឃើញផ្ទាល់ភ្នែកចំពោះការវាយប្រហារបានពិពណ៌នាអំពីរបួសសំខាន់ៗ របាយការណ៍របស់ក្រុមហ៊ុន Tesla ទៅកាន់និយតករ បាននិយាយថា វិស្វករមិនតម្រូវឲ្យមានការឈប់ សម្រាកដោយបង់ប្រាក់ដើម្បីសម្រាកព្យាបាលនោះទេ។ រហូតមកដល់ពេលនេះ ក្រុមហ៊ុនបានបដិសេធមិន ធ្វើអត្ថាធិប្បាយជុំវិញ ហេតុការណ៍នេះជាសាធារណៈទេ ។
មនុស្សដែលជិតស្និទ្ធនឹងក្រុមហ៊ុន Tesla ត្រូវបានគេដកស្រង់សម្តីដោយនិយាយថា មានការធ្វេសប្រហែសសុវត្ថិភាពជាច្រើន ហើយការរងរបួសនៅកន្លែងធ្វើការជាច្រើនគឺជាលទ្ធផលនៃបញ្ហាបច្ចេកទេសនៅរោងចក្រ Texas ។
មេធាវីតំណាងឲ្យកម្មករជាប់កិច្ចសន្យានៅរោងចក្រ Austin លោក Hannah Alexander ក្រោយមកបានប្រាប់កាសែត Daily Mail ថា ការរងរបួសដល់បុគ្គលិក និងសូម្បីតែអ្នកស្លាប់ត្រូវបានរាយការណ៍តិចតួចដោយ Tesla ដោយលើកឡើងពីការស្លាប់របស់កម្មករសំណង់នៅខែកញ្ញាឆ្នាំ ២០២១៕
ដោយ៖លី ភីលីព
