ខេត្តកណ្ដាល ៖ អបអរពិធីបុណ្យចូលឆ្នាំថ្មីប្រពៃណីជាតិ ឆ្នាំរោង ឆស័ក ព.ស. ២៥៦៨ នៅក្រុងតាខ្មៅ ខេត្តកណ្តាលរដ្ឋបាលខេត្តកណ្ដាល និងមន្ទីរអប់រំកាយ និងកីឡាខេត្ត បានរៀបចំឲ្យមានការប្រកួត ៤ ប្រភេទ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ជាមួយព្រឹត្តិការណ៍សង្ក្រាន្ត ខេត្តកណ្ដាល នៅសួនច្បារមាត់ទន្លេបាសាក់ ក្រុងតាខ្មៅ ។
ដើម្បីបង្កភាពសប្បាយ រីករាយ ជូនដល់ប្រជាពលរដ្ឋ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ខាងមុខនេះ រដ្ឋបាលខេត្តកណ្ដាល បានរៀបចំព្រឹត្តិការណ៍ សង្ក្រាន្តខេត្តកណ្ដាល នៅក្រុងតាខ្មៅ ដែលមានកម្មវិធីកម្សាន្តសប្បាយនានាជាច្រើន រយៈពេល៤ ថ្ងៃគឺចាប់ពីថ្ងៃទី១៣ ដល់ថ្ងៃទី១៦ ខែមេសា ខាងមុខនេះ ។
ក្រៅពីពិធីសាសនា រដ្ឋបាលខេត្តកណ្ដាល បានរៀបចំកម្មវិធីកម្សាន្តសប្បាយដូចជា ការប្រកួតបាល់ទាត់នារី រត់ប្រណាំង ប្រណាំងកង់ កីឡាទាញព្រ័ត្រ ការលេងល្បែងប្រជាប្រិយ ការសម្តែងល្ខោនបាសាក់ រាំវង់តន្ត្រីស្គរដី តន្ត្រីសម័យ (អមដោយស្តង់ពិព័រណ៍) បណ្តែតគោមទឹក គោមខ្យល់ និងការបាញ់កាំជ្រួច អបអរសាទរសង្ក្រាន្តខេត្តកណ្ដាលផងដែរ ។
ក្នុងឱកាសដែរ គង់ សោភ័ណ្ឌ អភិបាលខេត្ត បានអំពាវនាវ ដល់បងប្អូនប្រជាពលរដ្ឋ សូមអញ្ជើញមកទស្សនាកម្សាន្ត សប្បាយឲ្យបានច្រើនកុះករ ដែលមានរយៈពេល៤ ថ្ងៃ នៃព្រឹត្តិការណ៍សង្ក្រាន្តខេត្តកណ្ដាល ។ លោកអភិបាលខេត្តបានណែនាំដល់កង កម្លាំងប្រដាប់អាវុធទាំង៣ ត្រូវរៀបចំផែនការការពារ សណ្ដាប់ធ្នាប់ និងរបៀបរៀបរយ ជូនដល់ថ្នាក់ដឹកនាំពិសេសប្រជាពលរដ្ឋ ដែលមកលេងសប្បាយ ក្នុងព្រឹត្តិការណ៍សង្ក្រាន្ត ខេត្តកណ្ដាល ប្រកបដោយសុវត្ថិភាព និងរបៀបរៀបរយ ៕
ដោយ៖លី ភីលីព
