ឥណ្ឌា ៖ លោកនាយករដ្ឋមន្រ្តីឥណ្ឌា Narendra Modi មានអ្នកតាមដានលើសពី ១០០ លាននាក់នៅលើបណ្តាញផ្សព្វផ្សាយសង្គមយក្សអាមេរិក X ក្រោមការគ្រប់គ្រង របស់មហាសេដ្ឋីអាមេរិក លោក Elon Musk ហើយការគាំទ្រ និង គោពរស្រលាញ់ លោកធ្វើឲ្យលោកក្លាយជាមេដឹកនាំ ពិភពលោក ដែលមានអ្នក តាមដានច្រើនបំផុត ព្រមទាំងជាប់ចំណាត់ថ្នាក់លេខ ៧ ។
បច្ចុប្បន្នលោក Modi ជាមនុស្សទី ៧ មានអ្នកតាមដានច្រើនជាងគេនៅលើវេទិកាប្រព័ន្ធផ្សព្វផ្សាយសង្គម ហើយលោក Musk ស្ថិតនៅលំដាប់កំពូល ក្នុងបញ្ជីនេះមានអ្នកតាមដាន ១៨៩លាននាក់។ អតីតប្រធានាធិបតីអាមេរិក លោក បារ៉ាក់ អូបាម៉ា ជាឥស្សរជននយោបាយ ដែលមានអ្នកតាមដាន ច្រើនជាងគេ ដោយមានអ្នកតាមដានចំនួន ១៣១ លាននាក់។
លោក Modi ជាជនជាតិឥណ្ឌាមានអ្នកតាមដានច្រើនបំផុតនៅលើ X ។ ខ្ពស់បំផុតបន្ទាប់ពីកីឡាករ Cricket Virat Kohli ដែលមាន ៦៣ លាននាក់។ នាយករដ្ឋមន្រ្តីឥណ្ឌាក៏នាំមុខគូ ប្រជែងនយោបាយរបស់លោក រួមទាំង Rahul Gandhi ដែលដឹកនាំគណបក្សប្រឆាំង សម្ព័ន្ធភាពរួមបញ្ចូលការ អភិវឌ្ឍន៍ជាតិឥណ្ឌា (INDIA)។ លោក Arvind Kejriwal នាយករដ្ឋមន្រ្ដីនៃទីក្រុង New Delhi និងជាស្ថាបនិកគណបក្ស Aam Adam Party (AAP) អ្នកទាំង២មានអ្នកគាំទ្រប្រមាណ ២៦ លាននាក់។
ដោយបញ្ចេញមតិលើចំណុចសំខាន់នៃប្រព័ន្ធផ្សព្វផ្សាយសង្គម លោក Modi បាននិយាយថា លោករីករាយ និងពេញចិត្តក្នុងការពិភាក្សា ការជជែកវែកញែក ការយល់ដឹង ពរជ័យរបស់មនុស្ស ការរិះគន់ ក្នុងន័យស្ថាបនា និងអ្វីៗជាច្រើនទៀត ។ លោកបានបន្តថា លោកកំពុងទន្ទឹងរង់ចាំពេល វេលាចូលរួមស្មើគ្នានាពេលអនាគត។
លោក Modi បានចូលរួមជាមួយ X ពេលនោះត្រូវបានគេហៅថា Twitter ក្នុងឆ្នាំ ២០០៩ នៅពេលលោកកំពុងបម្រើការជានាយករដ្ឋមន្រ្តីនៃរដ្ឋ Gujarat ។ ទាំងនាយករដ្ឋមន្ត្រី និងគណៈរដ្ឋមន្ត្រីរបស់លោក ប្រើប្រាស់យ៉ាងសកម្មវេទិកានេះជាឧបករណ៍សម្រាប់ទំនាក់ទំនងជាមួយប្រជាពលរដ្ឋ និងក្រុមប្រឆាំង ក៏ដូចជាសម្រាប់ទំនាក់ទំនងការទូត៕
