វៀតណាម៖យោងតាមក្រសួងព័ត៌មាន និងសារគមនាគមន៍បានឲ្យដឹងថា កាមេរ៉ាឃ្លាំមើលមានជាង ៨០០,០០០គ្រឿងក្នុងប្រទេសវៀតណាម កំពុងចែករម្លែកទិន្នន័យរូបភាពតាមប្រព័ន្ធអ៊ីនធើណេត ដោយឧបករណ៍ជាច្រើនងាយនឹងរងការវាយប្រហារតាមប្រព័ន្ធអ៊ីនធើណេតណាស់ យោងតាមការចេញផ្សាយពីគេហទំព័រ VN Express ។
នៅពេលប្រកាសសេចក្តីព្រាងនៃបទប្បញ្ញត្តិបច្ចេកទេសជាតិស្តីពីតម្រូវការសុវត្ថិភាពព័ត៌មានមូលដ្ឋានសម្រាប់កាមេរ៉ា IP នៅប្រទេសវៀតណាមកាលពីដើមសប្តាហ៍នេះ ក្រសួងបានរាយការណ៍ថា ប្រព័ន្ធរបស់ខ្លួនបានរកឃើញកាមេរ៉ាឃ្លាំមើលជាង ៨០០,០០០ គ្រឿងក្នុងប្រទេសវៀតណាមបានចែករម្លែកទិន្នន័យរូបភាពជាសាធារណៈគិតត្រឹមខែឧសភា។
ចាប់តាំងពីឆ្នាំ ២០១៤ មក មានគេហទំព័រមួយដែលធ្វើឲ្យចូលប្រើកាមេរ៉ាឃ្លាំមើលជាង ៧០០,០០០គ្រឿងនៅទូទាំងពិភពលោក រួមទាំងរាប់ពាន់នាក់នៅប្រទេសវៀតណាម។ សូម្បីតែទិន្នន័យរូបភាពក៏ត្រូវបានជួញដូរផងដែរ ជាពិសេសពីកាមេរ៉ាបានដំឡើងនៅទីតាំងរសើប ដូចជាបន្ទប់គេង បន្ទប់ផ្លាស់ប្តូរ និងហាងស្ប៉ាជាដើម ស្ថិតនៅលើ Facebook និង Telegram ក្រុមជាច្រើនផ្សព្វផ្សាយការចូលប្រើកាមេរ៉ាផ្ទាល់ក្នុងតម្លៃថោកសមរម្យ។
ការផ្សព្វផ្សាយនៅលើប្រព័ន្ធផ្សព្វផ្សាយសង្គមបាននិយាយថា សេវាកម្មដែលមានតម្លៃ ៨០០,០០០ ដុង (៣២ ដុល្លារអាមេរិក) ធ្វើឲ្យអ្នកទិញចូលប្រើកាមេរ៉ាចំនួន ១៥ គ្រឿង ដោយអ្នកផ្តល់សេវាអះអាងថា មាន ជម្រើសរាប់រយរាប់ពាន់សម្រាប់អ្នកទិញ បង្ហាញថា ចំនួនកាមេរ៉ាសំខាន់ៗ ស្ថិតនៅក្រោមការគ្រប់គ្រងដោយគ្មានការអនុញ្ញាត៕
