ហុងកុង ៖ យោងតាមការចេញផ្សាយ ពីគេហទំព័រ Japan Today បានប្រាប់ឲ្យដឹងថា រដ្ឋាភិបាលហុងកុង កំពុងរារាំង មន្ត្រីរាជការ ភាគច្រើនពីការប្រើប្រាស់កម្មវិធីពេញ និយមដូចជា WhatsApp WeChat និង Google Drive នៅលើកុំព្យូទ័រការងារ របស់ពួកគេ ដោយសារតែហានិភ័យសុវត្ថិភាព ដែលអាចកើតមាន ។
គោលការណ៍ណែនាំសុវត្ថិភាព IT ចុងក្រោយបង្អស់ ពីការិយាល័យគោលនយោបាយឌីជីថល មានមន្ត្រីរាជការជាច្រើន បានត្អូញត្អែរអំពីភាព រអាក់រអួលបន្ថែម ។ បុគ្គលិករដ្ឋាភិបាល នឹងនៅតែប្រើប្រាស់ សេវាកម្មពីឧបករណ៍ផ្ទាល់ខ្លួននៅកន្លែងធ្វើការ ហើយអាចទទួលបានការ លើកលែងចំពោះការហាមឃាត់ ដោយមានការយល់ព្រមពីអ្នកគ្រប់គ្រង។
អ្នកជំនាញផ្នែកបច្ចេកវិទ្យាព័ត៌មានបាននិយាយថា ក្រុមហ៊ុនបានអនុម័ត គោលនយោបាយស្រដៀងគ្នានេះ ដោយសារតែការកើនឡើង ហានិភ័យនៃការលេច ធ្លាយទិន្នន័យ និងបញ្ហាប្រឈមសុវត្ថិភាព តាមអ៊ីនធើណេត។
លោក Sun Dong លេខាធិការ ទទួលបន្ទុកការច្នៃប្រឌិត បច្ចេកវិទ្យា និង ឧស្សាហកម្ម បាននិយាយនៅ កម្មវិធីវិទ្យុមួយកាលពីថ្ងៃអង្គារថា ការហាមឃាត់នេះជាការចាំបាច់ណាស់ ខណៈការលួចចូលកំពុងក្លាយ ជាបញ្ហាកាន់តែធ្ងន់ធ្ងរ។ លោកបានបន្តថា រដ្ឋាភិបាលនៃអាមេរិក និងប្រទេសចិនក៏បានអនុម័តវិធានការ តឹងរ៉ឹងសម្រាប់ប្រព័ន្ធកុំព្យូទ័រខាងក្នុងរបស់ពួកគេ។
មន្ត្រីរាជការម្នាក់ដែលមាននាមត្រកូល Lee សុំមិនបញ្ចេញឈ្មោះ ដោយសារតែនាងមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ បាននិយាយថា ការិយាល័យ របស់នាងតែងតែប្រើប្រាស់ សេវាកម្មផ្ទុកទិន្នន័យលើ Cloud ដើម្បីផ្លាស់ប្តូរឯកសារធំៗ ជាមួយអ្នកលក់នៅខាង ក្រៅរដ្ឋាភិបាល។
លោក Francis Fong ជាប្រធានកិត្តិយស នៃសហព័ន្ធបច្ចេកវិទ្យាព័ត៌មានហុងកុង បាននិយាយថា ក្រុមមន្ត្រីបានប្រាប់លោកថា គោលការណ៍នេះ មានគោល បំណងការពារមេរោគពីការឆ្លងជញ្ជាំងភ្លើង របស់ខ្លួនតាមរយៈសារដែលបានអ៊ិនគ្រីប។ លោកបានបន្ថែមថា វាក៏អាចដោះស្រាយបញ្ហា ជាមួយនឹងការបំពាន ទិន្នន័យផងដែរ។
លោក Anthony Lai នាយកក្រុមហ៊ុន VX Research Limited ជាក្រុមហ៊ុនសន្តិសុខ តាមអ៊ីនធើណេត នៅទីក្រុងហុងកុង និងចក្រភពអង់គ្លេស បាននិយាយថា វិធីសាស្រ្តរបស់រដ្ឋាភិបាល គឺសមរម្យដោយសារតែការយល់ដឹង អំពីសុវត្ថិភាពអ៊ីនធើណឹត ទាបក្នុងចំណោមបុគ្គលិកមួយចំនួន និងកង្វះប្រព័ន្ធត្រួតពិនិត្យផ្ទៃក្នុង ដ៏ទូលំទូលាយ។
កាលពីដើមឆ្នាំនេះ ការបំពានទិន្នន័យនៅនាយកដ្ឋានផ្សេងៗ របស់រដ្ឋាភិបាលហុងកុង បានសម្រុះសម្រួលព័ត៌មានផ្ទាល់ខ្លួន របស់មនុស្សយ៉ាងហោចណាស់ រាប់ម៉ឺននាក់ និងបង្កឲ្យមានការព្រួយបារម្ភ ៕
