វ៉ាស៊ីនតោន៖ យោងតាមការចេញផ្សាយពីគេហទំព័រ Japan Today បានប្រាប់ឲ្យដឹងថា នៅពេលថ្ងៃផុតកំណត់ចុងសប្តាហ៍ មកដល់សម្រាប់កម្មវិធីវីដេអូខ្លី TikTok របស់ក្រុមហ៊ុនបច្ចេកវិទ្យាយក្សចិន ថ្នាក់ដឹកនាំក្រុមហ៊ុនអាមេរិកល្បីលបានជួបជុំគ្នា ដើម្បីដេញថ្លៃទិញគេហទំព័រប្រព័ន្ធ ផ្សព្វផ្សាយសង្គមវីដេអូខ្លីជាផ្លូវការហើយ។
Amazon និងក្រុមហ៊ុនជាសម្ព័ន្ធដែល ដឹកនាំដោយស្ថាបនិក OnlyFans លោក Tim Stokely ជាក្រុមហ៊ុនចុងក្រោយគេចង់ទិញ TikTok ជួបពិភាក្សាគ្នា ខណៈគេហទំព័រនេះប្រឈមនឹង កាលបរិច្ឆេទផុតកំណត់នៅថ្ងៃទី ៥ ខែមេសា ដើម្បីឈានដល់កិច្ចព្រមព្រៀងមួយ ស្វែងរកអ្នកទិញដែលមិនមែនជាជនជាតិចិន ស្ថិតនៅក្រោមការគំរាមកំហែង នៃការហាមឃាត់ពីអាមេរិក។
មន្ត្រីរដ្ឋបាល Trump បានជួបប្រជុំគ្នាកាលពីថ្ងៃពុធដើម្បី ពិភាក្សាអំពីជម្រើសផ្សេងៗសម្រាប់ TikTok ។ មន្ត្រីអាមេរិកបានលើកឡើងពីការព្រួយបារម្ភ ផ្នែកសុវត្ថិភាពជុំវិញទំនាក់ទំនងរបស់ កម្មវិធីជាមួយប្រទេសចិន ដែល TikTok និងម្ចាស់ ByteDance បានបដិសេធមិនលក់។
ដឹកនាំទាំង ២ បានប្រាប់ Reuters កាលពីថ្ងៃពុធថា ក្រុមហ៊ុន Startup Zoop គ្រប់គ្រងដោយ Stokely ស្ថាបនិកគេហទំព័រប្រព័ន្ធផ្សព្វផ្សាយសង្គម OnlyFans បានចាប់ដៃគូជាមួយមូលនិធិរូបិយប័ណ្ណគ្រីបតូ បានដាក់ផែនការដំណាក់កាល ចុងក្រោយដើម្បីដេញថ្លៃទិញ TikTok ។
មន្ត្រីរដ្ឋបាលអាមេរិកម្នាក់បានបញ្ជាក់ថា Amazon បានផ្ញើលិខិតទៅអនុប្រធាន JD Vance និងលេខាធិការក្រសួងពាណិជ្ជកម្មលោក Howard Lutnick រីឯ Amazon បានបដិសេធមិនធ្វើអត្ថាធិប្បាយអ្វីឡើយ ខណៈ TikTok និង ByteDance មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ ភាគហ៊ុនរបស់ក្រុមហ៊ុន Amazon បានកើនឡើងប្រហែល ២ភាគរយ បន្ទាប់ពីព័ត៌មាននៃការដេញថ្លៃ TikTok នាទីចុងក្រោយ។
Amazon មានមហិច្ឆតាជាយូរមកហើយសម្រាប់ បណ្តាញប្រព័ន្ធផ្សព្វផ្សាយសង្គមក្នុងផ្ទះ អាចជួយឲ្យវាលក់ទំនិញបានកាន់តែច្រើន និងទាក់ទាញទស្សនិកជនវ័យក្មេង។ វាបានទិញគេហទំព័រវីដេអូផ្សាយផ្ទាល់ Twitch ក្នុងឆ្នាំ ២០១៤ក្នុងតម្លៃជិត ១ ពាន់លានដុល្លារ និងគេហទំព័រពិនិត្យសៀវភៅ Goodreads ក្នុងឆ្នាំ ២០១៣ ជាផ្នែកមួយនៃកិច្ចខិតខំប្រឹងប្រែង របស់ខ្លួនក្នុងការកសាងបណ្តាញសង្គម ដែលអាចដំណើរការបាន។
នេះបើតាម Reuters បានរាយការណ៍កាលពីសប្តាហ៍មុនថា ក្រុមហ៊ុនភាគហ៊ុនឯកជន Blackstone កំពុងពិភាក្សាជាមួយម្ចាស់ភាគហ៊ុនមិនមែនជាជនជាតិចិនរបស់ ByteDance ដឹកនាំដោយ Susquehanna International Group និង General Atlantic ក្នុងការរួមចំណែកដើមទុនថ្មីដើម្បីដេញថ្លៃ សម្រាប់អាជីវកម្មរបស់ TikTok នៅសហរដ្ឋអាមេរិក។
នេះបើយោងតាមកាសែត Financial Times បានរាយការណ៍កាលពីថ្ងៃអង្គារថា ក្រុមហ៊ុនមូលធនបណ្តាក់ទុនរបស់អាមេរិក Andreessen Horowitz ក៏កំពុងពិភាក្សាផងដែរដើម្បីបន្ថែម មូលនិធិខាងក្រៅដើម្បីទិញអ្នកវិនិយោគចិនរបស់ TikTok ដែលជាផ្នែកមួយនៃការដេញថ្លៃ ដែលដឹកនាំដោយ Oracle និងអ្នកវិនិយោគអាមេរិក ផ្សេងទៀតដើម្បីឆ្លាក់វាចេញពី ByteDance ៕
