តូក្យូ៖ ក្រុមហ៊ុន Honda Motor Co បាននិយាយកាលពីថ្ងៃពុធថា ខ្លួននឹងផ្លាស់ប្តូរការផលិតរថយន្ត Civic កូនកាត់សម្រាប់ទីផ្សារអាមេរិកពីប្រទេសជប៉ុន ទៅកាន់រោងចក្ររបស់ខ្លួននៅរដ្ឋ Indiana ខណៈក្រុមហ៊ុននេះព្យាយាមកាត់បន្ថយផលប៉ះពាល់ នៃគោលនយោបាយពន្ធរបស់ប្រធានាធិបតីលោក Donald Trump យោងតាមការចេញផ្សាយពីគេហទំព័រ Japan Today ។
ក្រុមហ៊ុនបានវិនិច្ឆ័យថា សកម្មភាពបែបនេះជាការសមស្រប ក្នុងការផ្លាស់ទីទិន្នផលនៃម៉ូដែលនេះ ដែលបច្ចុប្បន្នបានប្រមូលផ្តុំនៅរោងចក្ររបស់ខ្លួននៅខេត្ត Saitama ទៅកាន់អាមេរិក ដោយពិចារណាលើប្រជាប្រិយភាពខ្ពស់របស់ Civic នៅទីនោះ។
ការផ្លាស់ប្តូរនេះកើតឡើងនៅពេលដែលពន្ធបន្ថែម 25 ភាគរយរបស់លោក Trump លើការនាំចូលរថយន្តទាំងអស់ ដែលបានដាក់កាលពីដើមខែនេះបានបង្ខំឱ្យ ក្រុមហ៊ុនផលិតរថយន្តទូទាំងពិភពលោក ពិនិត្យមើលខ្សែសង្វាក់ផ្គត់ផ្គង់របស់ពួកគេ ដើម្បីកាត់បន្ថយផលប៉ះពាល់អវិជ្ជមាន។
នេះបើយោងតាមរដ្ឋាភិបាលនៃខេត្ត Fukuoka ជាកន្លែងដែល Nissan មានរោងចក្រដំឡើងបាននិយាយថា ក្នុងចំណោមក្រុមហ៊ុនផលិតរថយន្តជប៉ុន Nissan Motor Co កំពុងពិចារណាផ្លាស់ប្តូរផលិតកម្ម ក្នុងស្រុកមួយចំនួននៃរថយន្ត Rogue sport utility ទៅកាន់អាមេរិក។ ក្រុមហ៊ុន Mitsubishi Motors Corp ក៏បានផ្អាកជាបណ្ដោះអាសន្នការចែកចាយ រថយន្តរបស់ខ្លួនដែលបាននាំចេញទៅ សហរដ្ឋអាមេរិកនៅកំពង់ផែអាមេរិក។
ក្រុមហ៊ុន Honda ផលិតរថយន្តភាគច្រើនសម្រាប់ ទីផ្សារអាមេរិកនៅអាមេរិក កាណាដា និងម៉ិកស៊ិក។ ការនាំចេញរបស់ខ្លួនពីប្រទេសជប៉ុន មានចំនួនតិចជាង១ ភាគរយនៃរថយន្តរបស់ខ្លួនដែលត្រូវបានលក់ នៅលើទីផ្សារសេដ្ឋកិច្ចធំបំផុតរបស់ពិភពលោក។
ក្រុមហ៊ុនបាននិយាយថា ខ្លួននឹងបន្តដឹកជញ្ជូនពីប្រទេសជប៉ុននូវរថយន្តស្ព័រ Civic Type R ដែលនឹងក្លាយជាគំរូតែមួយគត់សម្រាប់ ទីផ្សារអាមេរិកដែលផលិតនៅផ្ទះ៕
