ឥណ្ឌា៖ ប្រទេសឥណ្ឌាបានប្រកាសថា ខ្លួននឹងបញ្ជូនអវកាសយានិកទៅទីអវកាស នៅខែក្រោយនេះជាលើកដំបូងក្នុងរយៈពេល ៤០ ឆ្នាំ ហើយក៏ជាជនជាតិឥណ្ឌា ចុងក្រោយគេបានចូលទីអវកាស គឺលោក Rakesh Sharma កាលឆ្នាំ ១៩៨៤ ក្នុងការហោះហើរនៅលើយានអវកាស Soyuz របស់សូវៀត យោងតាមការចេញផ្សាយពីគេហទំព័រ RT។
ប្រធានក្រុម Shubhanshu Shukla នៃកងទ័ពអាកាសឥណ្ឌានឹងហោះហើរ ទៅកាន់ស្ថានីយ៍អវកាសអន្តរជាតិ (ISS) ក្នុងខែឧសភាជាផ្នែកមួយនៃបេសកកម្ម Axiom-4 ជាការហោះហើរអវកាសឯកជនដែលដំណើរការដោយ Axiom Space ក្នុងភាពជាដៃគូជាមួយ SpaceX និង NASA នាយកដ្ឋានអវកាសឥណ្ឌាបានប្រកាស។
ការប្រកាសនេះត្រូវបានធ្វើឡើងបន្ទាប់ពីកិច្ចប្រជុំ ថ្នាក់កំពូលមួយដើម្បីពិភាក្សាពីផែនការ របស់អង្គការស្រាវជ្រាវអវកាសឥណ្ឌា (ISRO) កាលពីថ្ងៃសុក្រថា លោក Shukla ជាអវកាសយានិកម្នាក់ក្នុងចំណោម៤ នាក់ត្រូវបានជ្រើសរើសកាលពីឆ្នាំមុនសម្រាប់កម្មវិធី Gag anyaan របស់ប្រទេសអាស៊ីខាងត្បូងដែលមានបំណងបញ្ជូនអវកាសយានិក ដំបូងបង្អស់របស់ប្រទេសឥណ្ឌាទៅកាន់ទីអវកាសនៅលើយានអវកាស។
សេចក្តីថ្លែងការណ៍បានកត់សម្គាល់ថា លោក Shukla នឹងក្លាយជាជនជាតិឥណ្ឌាដំបូងគេបានទៅទស្សនា ISS និងជាអវកាសយានិកឥណ្ឌាដំបូងគេដែលធ្វើដំណើរ ទៅកាន់ទីអវកាសក្នុងរយៈពេលជាង ៤ ទសវត្សរ៍។
សេចក្តីថ្លែងការណ៍បានកត់សម្គាល់ថា បេសកកម្ម Axiom-4 របស់លោក Shukla ត្រូវបានគេរំពឹងថានឹងផ្តល់នូវបទពិសោធន៍ដ៏ មានតម្លៃក្នុងទិដ្ឋភាពផ្សេងៗនៃការធ្វើដំណើរក្នុងលំហ រួមទាំងប្រតិបត្តិការហោះហើរក្នុងលំហ ពិធីការនៃការបាញ់បង្ហោះ ការសម្របខ្លួនទៅនឹងមីក្រូទំនាញ និងការត្រៀមលក្ខណៈសង្គ្រោះបន្ទាន់ ទាំងអស់នេះមានសារសំខាន់សម្រាប់ផែនការរបស់ ប្រទេសឥណ្ឌាក្នុងការបញ្ជូនបេសកកម្មនាវិកទៅកាន់ទីអវកាស៕
