បរទេស៖ ប្រធានាធិបតីអាមេរិកលោក Donald Trump បានប្រកាសពីការចាប់ផ្តើមជាផ្លូវការ នូវគំនិតផ្តួចផ្តើមការពារមីស៊ីល ទូទាំងប្រទេសថ្មីមួយ ដែលមានឈ្មោះថា ដំបូលមាស ឬ “Golden Dome” ដោយសន្យាថា នឹងសាងសង់ខែលរួមបញ្ចូលគ្នា ក្នុងលំហរដែលមានសមត្ថភាពស្ទាក់ចាប់មីស៊ីល ពីគ្រប់ទីកន្លែងក្នុងពិភពលោក ។
យោងតាមសារព័ត៌មាន RT ចេញផ្សាយនៅថ្ងៃទី២១ ខែឧសភា ឆ្នាំ២០២៥ បានឱ្យដឹងថា ថ្លែងនៅក្នុងការិយាល័យ Oval កាលពីថ្ងៃអង្គារ លោក Trump បានពណ៌នាអំពីគម្រោង “ទំនើបកម្ម” ជាមួយនឹងការ ចំណាយដែលត្រូវបានប៉ាន់ស្មានចំនួន ១៧៥ពាន់លានដុល្លារ ដែលជាការលោតផ្លោះ ជាប្រវត្តិសាស្ត្រនៅក្នុងវិស័យ ការពារមាតុភូមិរបស់អាមេរិក។
លោក Trump បាននិយាយថា “ការរចនាសម្រាប់ប្រព័ន្ធការពារ ដែនអាកាស Golden Dome នឹងរួមបញ្ចូលជាមួយសមត្ថភាព ការពារជាតិដែលមានស្រាប់របស់យើង ហើយគួរតែដំណើរការពេញលេញ មុនពេលចុងបញ្ចប់នៃអាណត្តិរបស់ខ្ញុំ” ។ “នៅពេលសាងសង់បានពេញលេញ Golden Dome នឹងមានសមត្ថភាពស្ទាក់ចាប់មីស៊ីល ទោះបីជាមីស៊ីលត្រូវបានបាញ់ចេញពីផ្នែកផ្សេងៗនៃពិភពលោកក៏ដោយ ហើយទោះបីជាមីស៊ីលត្រូវបានបាញ់ចេញពីលំហអាកាសក៏ដោយ ។”
លោក Trump បានបន្ថែមថា ខែលការពារមីស៊ីលនឹងរួមបញ្ចូលគ្នា នូវទ្រព្យសម្បត្តិការពារបច្ចុប្បន្នជាមួយ នឹងបច្ចេកវិទ្យាជំនាន់ក្រោយ ដែលត្រូវបានដាក់ពង្រាយនៅទូទាំងលើផ្ទៃដី សមុទ្រ និង លំហរ រួមទាំងឧបករណ៍ចាប់សញ្ញាគន្លង និងឧបករណ៍ស្ទាក់ចាប់។ ចំណែករុស្ស៊ី វិញ គឺធ្លាប់បានរិះគន់គំនិតផ្តួចផ្តើមនេះថាជាជំហានអស្ថិរភាព ឆ្ពោះទៅរកការបំប្លែងអាវុធក្នុងលំហរ ៕
