ហុងកុង៖បើយោងតាមចេញផ្សាយផ្លូវការ របស់គេហទំព័រ Channel news Asia បានប្រាប់ឲ្យដឹងថា គូស្នេហ៍ជាតារាសម្តែងល្បីៗឈ្មោះ គឺអ្នកនាង Fann Wong និងលោក Christopher Lee នេះនឹងសម្តែង ជាតួអង្គអធិរាជ និងមហេសីក្នុងរឿង Library Of Mystory ជាការសហការគ្នាក្នុងខ្សែភាពយន្តដំបូង របស់ពួកគេចាប់តាំងពីរឿង The Wedding Game កាលឆ្នាំ ២០០៩ ។
តារាសម្តែង និងតារាចម្រៀងសិង្ហបុរី អ្នកនាង Fann Wong និងតារាសម្តែង និងតារាចម្រៀង Christopher Lee នឹងសម្តែងជាតួអង្គគំនូរជីវចលដែលនឹងចេញផ្សាយឆាប់ៗនេះ គឺរឿង Library Of Mystory ដែលគ្រោងនឹងចេញផ្សាយនៅខែមិថុនា ឆ្នាំ ២០២៧។
ខ្សែភាពយន្តនេះ ជាកិច្ចសហការក្នុងខ្សែភាពយន្តដំបូងរបស់គូស្នេហ៍តារាល្បីៗចាប់តាំងពីរឿងកំប្លែងបែបមនោសញ្ចេតនា The Wedding Game ឆ្នាំ ២០០៩។ ខ្សែភាពយន្តនោះ ពួកគេបានសម្តែងជាតួអង្គតារាល្បីៗ ២ នាក់ ទោះបីជាមិនចូលចិត្តគ្នាក៏ដោយ ក៏ពួកគេបានយល់ព្រមភ្ជាប់ពាក្យក្លែងក្លាយដែលរៀបចំឡើងដោយក្រុមគ្រប់គ្រងរបស់ពួកគេ ដើម្បីជំរុញអាជីពរបស់ពួកគេ។
អ្នកនាង Wong និងលោក Lee មានទំនាក់ទំនងស្នេហារួចហើយនៅពេលនោះ បានចុះបញ្ជីអាពាហ៍ពិពាហ៍របស់ពួកគេភ្លាមៗបន្ទាប់ពីខ្សែភាពយន្តនេះ ហើយបានរៀបចំពិធីមង្គលការរបស់ពួកគេនៅពេលក្រោយក្នុងឆ្នាំនោះ។ គូស្នេហ៍នេះក៏បានធ្វើការជាមួយគ្នាលើគម្រោងទូរទស្សន៍ជាច្រើន រួមទាំងរឿងភាគ The Return Of The Condor Heroes ក្នុងឆ្នាំ ១៩៩៨ រឿង Looking For Stars ឆ្នាំ ២០០០ និងរឿង Doppelganger ឆ្នាំ ២០១៨។
រឿង Library Of Mystory ដែលមានឈុតឆាកក្នុងសម័យរាជវង្សថាង ដើរតាមព្រះអង្គម្ចាស់រាជទាយាទ ឆេងស៊ី បញ្ចូលសំឡេងដោយ Clement Yeo ខណៈព្រះអង្គយាងចូលសាលាសម្រាប់កុមារអភិជន ជាកន្លែងដែលព្រះអង្គបានជួបស៊ីយូ ដែលបញ្ចូលសំឡេងដោយ Lea Chong ។លោក Christopher Lee និងអ្នកនាង Fann Wong នឹងបញ្ចូលសំឡេងឲ្យមាតាបិតារបស់ព្រះអង្គម្ចាស់រាជទាយាទ គឺព្រះចៅអធិរាជ និងព្រះមហេសី៕
