បរទេស៖ ខ្សែការពារ Harry Maguire បានអះអាងយ៉ាងច្បាស់ថា ក្រុមកីឡាករនៃក្លិបបិសាចក្រហម Manchester United បានបំភ្លេចចោល និងបញ្ចប់ការខ្វាយ ខ្វល់រួចរាល់ហើយ នូវបញ្ហាចម្រូងចម្រាសពាក់ព័ន្ធនឹងការបញ្ចេញ កំហឹងរបស់ខ្សែការពារ Lisandro Martínez កាលពីពេលថ្មីៗនេះ នេះបើយោងតាមការចេញផ្សាយពីសារព័ត៌មាន GOAL ថ្ងៃទី២០ ខែតុលា ឆ្នាំ២០២៦ ។
បញ្ហានេះបានកើតឡើងបន្ទាប់ពីខ្សែការពារសញ្ជាតិ អាហ្សង់ទីនរូបនេះ បានប្រើប្រាស់ពាក្យសម្ដីធ្ងន់ៗរិះគន់ ទៅលើនាយកផ្នែកកីឡាបាល់ទាត់លោក Jason Wilcox ក្រោយពេល United ទទួលបរាជ័យក្រោមថ្វីជើងក្រុម Atletico Madrid ក្នុងក្របខ័ណ្ឌ Champions League ដោយរូបគេបានចោទសួរពីមហិច្ឆតានៃការទិញ ដូរក្រុមកីឡាករនារដូវក្តៅកន្លងទៅ។ ទោះជាយ៉ាងណាក្តី ក្រោយមកកីឡាកររូបនេះបានចេញមុខសុំទោសជាផ្លូវការរួចរាល់ហើយ។
Martínez បានវិលត្រឡប់មកចូលរួមប្រកួតវិញ ក្នុងជំនួបដែល United ស្មើ ១-១ ជាមួយ Leeds United កាលពីថ្ងៃអាទិត្យ ទោះបីជារូបគេត្រូវបានប្តូរចេញនៅតង់ទីពីរក៏ដោយ។
ថ្លែងប្រាប់សារព័ត៌មាន Sky Sports ក្រោយការប្រកួតទល់នឹង Leeds លោក Maguire បានបញ្ជាក់ថា៖ “ជាការពិតណាស់ តែងតែមានពាក្យចចាមអារ៉ាមច្រើនជុំវិញក្លិប ពិសេសក្នុងសប្តាហ៍កន្លងទៅនេះ។ ប៉ុន្តែ Lisandro បានចេញមុខសុំទោស ហើយពួកយើងក៏បានឈានទៅមុខបន្តទៀត (បោះបង់រឿងនោះចោល)។ គាត់បានលេងយ៉ាងល្អក្នុងវគ្គទីមួយ ហើយពួកយើងសង្ឃឹមថាគាត់មិនមានរបួសធ្ងន់ធ្ងរ ដើម្បីអាចត្រឡប់មកជួយក្រុមវិញបាន។”
ទន្ទឹមនឹងនេះ អ្នកចាត់ការក្រុមលោក Michael Carrick ក៏ធ្លាប់បានលើកឡើងផងដែរថា ការបញ្ចេញកំហឹងរបស់ Martínez គឺ “ពិតជាមិនមែនជារឿងធំដុំសម្រាប់ក្រុមនោះទេ។”
នៅពេលសួរថាតើស្មារតីសាមគ្គីភាពក្នុងបន្ទប់ផ្លាស់សម្លៀកបំពាក់រងផលប៉ះពាល់ដោយសារការរិះគន់របស់មិត្តរួមក្រុមឬទេ Maguire បានឆ្លើយតបថា៖ “នៅពេលអ្នកលេងឱ្យក្លិបនេះ ស្មារតីរបស់អ្នកតែងតែត្រូវបានសាកល្បង ពិសេសនៅពេលដែលអ្នកមិនសូវទទួលបានជ័យជម្នះ។ ពួកយើងលេងមិនបានល្អទាល់តែសោះ បើប្រៀបធៀបនឹងចំនួនជ័យជម្នះដែលយើងធ្វើបានកាលពីរដូវកាលមុន។”
ខ្សែការពាររូបនេះបានបន្ថែមទៀតថា៖ “ពួកយើងត្រូវបានគេសាកល្បងរៀងរាល់សប្តាហ៍ ហើយកីឡាករទាំងអស់ត្រូវតែស៊ាំនឹងរឿងនេះ ដោយត្រូវស្វែងរកកម្លាំងចិត្តពីខាងក្នុងដើម្បីជួយក្រុម។ ពួកយើងនឹងបន្តរួមសាមគ្គីគ្នា ហើយត្រៀមខ្លួនសម្រាប់ការប្រកួតដ៏សំខាន់មួយទៀតនៅថ្ងៃពុធខាងមុខ។”
គួរបញ្ជាក់ផងដែរថា បច្ចុប្បន្ន Manchester United រកបានត្រឹមតែ ៧ពិន្ទុប៉ុណ្ណោះ ពីការប្រកួត ៧លើកដំបូងក្នុងក្របខ័ណ្ឌ Premier League នារដូវកាលនេះ ដែលស្ថានភាពនេះបានរុញច្រានឱ្យអ្នកចាត់ការ Michael Carrick ទទួលស្គាល់ការពិតថា ស្ថានការណ៍បច្ចុប្បន្ន “មើលទៅហាក់មិនសូវល្អនោះទេ”៕
ប្រែសម្រួល៖ គីរី
