ភ្នំពេញ៖ អ្នកប្រដាល់ សែម ណាង “ឡុង សំណាង” ក្លិបសាលវ័ន្តកីឡាជួបជាមួយអ្នកប្រដាល់ថៃ Aram Boy ប្រកួតគ្នាក្នុងទម្ងន់៦៣,៥០គីឡូក្រាម ខណៈ អ្នកប្រដាល់ជើងស៊ុន ប៊ុនសាន់ ក្លិបនាគរាជចតុមុខប៉ះអ្នកប្រដាល់សាន សំអុន ក្លិប អារុណរះ កីឡា ប្រកួតគ្នាក្នុងទម្ងន់៥៤គីឡូក្រាម នៃ នៃព្រឹត្តិការណ៍ប្រដាល់ដណ្តើមនៅសង្វៀន Boostrong Fighter On Fire របស់ SEATV នាព្រឹកថ្ងៃអាទិត្យ ទី១ ខែមីនា ឆ្នាំ២០២០នេះ។
លោកញាណ សុធី អ្នកគ្រប់គ្រងសង្វៀន SEATV បានប្រាប់ឲ្យដឹងថា ឡុង សំណាង និង Aram Boy ជើងខ្លាំងទាំង២នាក់នេះមិនធ្លាប់ប៉ះគ្នាទេកន្លងមក។ សម្រាប់សំណាង វាយលឿន រហ័ស និង ខ្លាំង ព្រមទាំងមានផ្លែល្អថែមទៀត។ យ៉ាងណាសំណាងគេជាអ្នកប្រដាល់ដែលមានកម្លាំងកាយសម្បទារឹងមាំ និងចិត្តប្រដាល់ធំ មិនញញើតចំពោះគូប្រកួតឡើយ ។
ចំណែកអ្នកប្រដាល់ថៃ Aram Boy រូបនេះ មានភាពខ្លាំងខាងជង្គង់ និង កែង ហើយក៏ប៉ិនកាច់ផ្ដួលគូប្រកួតដែរ ។ គេវាយមួយៗទេ តែច្បាស់ និង ចំគោលដៅល្អ។ ទោះជាយ៉ាងនេះក្តី សម្រាប់ការប្រកួតលើកនេះ មិនដឹងថា Aram Boy អាច ឈ្នះឡុង សំណាង បានឬអត់នោះទេ?។
តែយ៉ាងណា អ្នកប្រដាល់ថៃរូបនេះ ប្រហែលជាមិនឈ្នះឡុងសំណាង នោះទេ ដោយសារសំណាងគេខ្លាំងសម្រុកវាយ មិនដកដៃឡើយ។ ឡុង សំណាងមានប្រវត្តិប្រកួតចំនួន៩៥លើក ឈ្នះ៨១លើក ចាញ់១១លើក និងស្មើ០៣លើក និង Aram Boy មានប្រវត្តិប្រកួតចំនួន ៧៩លើក ឈ្នះ៦២លើក ចាញ់១៦លើក និង ស្មើ០១លើក៕ ដោយ៖លី ភីលីព
