តូក្យូ៖ពិព័រណ៍រថយន្តនៅទីក្រុងតូក្យូ “Tokyo Motor Show” បើកសប្តាហ៍នេះជាមួយនឹងបច្ចេកវិទ្យានាពេលអនាគតជាច្រើន ប៉ុន្តែអវត្តមានមួយដែលមានឥទ្ធិពលដ៏ខ្លាំងបំផុតនៃឧស្សាហកម្មរថយន្ត គឺ អតីតប្រធានក្រុមហ៊ុន Nissan លោក Carlos Ghosn យោងតាមការចេញផ្សាយពីគេហទំព័រជប៉ុនធូដេ។
ចាប់តាំងពីការចាប់ខ្លួនលោក Ghosn ចំពោះការប្រព្រឹត្តខុសហិរញ្ញវត្ថុនៅក្នុងខែវិច្ឆិកាឆ្នាំ ២០១៨ ក្រុមហ៊ុនNissan បានធ្លាក់ចុះយ៉ាងខ្លាំងហើយការលក់យានយន្តនៅលើពិភពលោកបានធ្លាក់ចុះ។នៅក្នុងបទបង្ហាញមួយទៅកាន់អ្នកយកព័ត៌មាននោះ នាយកប្រតិបត្តិជាន់ខ្ពស់របស់ក្រុមហ៊ុន Nissan ចំនួន២រូបបានជជែកគ្នាអំពីរថយន្តអគ្គិសនីដែលមានបង្ហាញនៅស្តង់របស់ក្រុមហ៊ុន Nissan Motor Co ។
លោក Ghosn បានអវត្តមានគួរឲ្យកត់សម្គាល់ ប៉ុន្តែកេរ្តិ៍ដំណែលរបស់លោកត្រូវបានបង្ហាញឲ្យឃើញនៅក្នុងគំនិតផ្តួចផ្តើមជាច្រើនដែលលោកបានដឹកនាំនៅពេលដំណើរការក្រុមហ៊ុនជិតពីរទសវត្ស។ ការតាំងពិព័រណ៍នៅទីក្រុងតូក្យូផ្តល់ឲ្យក្រុមហ៊ុនផលិតរថយន្តនូវឱកាសដើម្បីបង្ហាញពីបច្ចេកវិទ្យានៃការចល័តដែលនឹងមកដល់នាពេលខាងមុខរបស់ឧស្សាហកម្មនេះរួមមានកោសិកាឥន្ធនៈអេកូឡូស៊ីនិងឧបករណ៍ដឹកជញ្ជូនផ្ទាល់ខ្លួនដែលមើលទៅដូចជាម៉ូតូស្កូតឺ។
នាយកប្រតិបត្តិថ្មីរបស់ក្រុមហ៊ុនគឺលោក Makoto Uchida និងលោក Hiroto Saikawa ដែលបានលាឈប់កាលពីខែមុនដោយសាររឿងអាស្រូវហិរញ្ញវត្ថុផ្ទាល់ខ្លួនមិនបានបង្ហាញខ្លួននៅក្នុងបទបង្ហាញប្រព័ន្ធផ្សព្វផ្សាយ។
មន្ត្រីក្រុមហ៊ុន Nissan បាននិយាយថា លោក Uchida មិនទាន់ចូលកាន់តំណែងជាផ្លូវការនៅឡើយទេ ហើយនៅតែជាអ្នកទទួលខុសត្រូវលើការបណ្តាក់ទុនរួមគ្នារបស់ក្រុមហ៊ុន Nissan នៅប្រទេសចិន ហើយអ្នកស្នងតំណែងរបស់លោកនៅទីនោះមិនទាន់ត្រូវបានជ្រើសរើសនៅឡើយទេ៕ដោយ៖លី ភីលីព
