បរទេស ៖ មន្ត្រីនាំពាក្យរដ្ឋាភិបាលក្រិក បាននិយាយនៅថ្ងៃ ចន្ទសប្ដាហ៍នេះថា ប្រទេសក្រិកគ្រោង នឹងទិញអាវុធ ជំរុញបង្កើនកងកម្លាំង ប្រដាប់អាវុធ និងកែប្រែឧស្សាហកម្មការពារជាតិ ស្របពេលភាពតានតឹងជាមួយតួកគី ជុំវិញធនធានថាមពល នៅក្នុងសមុទ្រមេឌីទែរ៉ានេ ភាគខាងកើតកើនឡើង ។
លោក Stelios Petsas ជាមន្ត្រីនាំពាក្យរដ្ឋាភិបាលក្រិក បានិយាយប្រាប់អ្នកសារព័ត៌មាន យ៉ាងដូច្នេះថា “យើងកំពុងតែពិភាក្សាគ្នា ជាមួយសម្ពន្ធមិត្តនានា ដើម្បីជំរុញបង្កើនកងកម្លាំង ប្រដាប់អាវុធរបស់យើង” និងបន្ថែមទៀតថា លោក នាយករដ្ឋមន្ត្រី Kyriakos Mitsotakis នឹងដាក់ចេញផែនការ របស់លោក នៅក្នុងអំឡុងថ្លែងសុន្ទរកថា ស្តីពីគោលនយោបាយ សេដ្ឋកិច្ចប្រចាំឆ្នាំ នៅថ្ងៃសៅរ៍ ។
គួរបញ្ជាក់ថា កាលពីសប្ដាហ៍មុន មន្ត្រីរដ្ឋាភិបាលក្រិកបាននិយាយ ប្រាប់សារព័ត៌មានថា ប្រទេសក្រិកំពុងតែពិភាក្សាគ្នា ជាមួយប្រទេសបារាំង និងប្រទេសដទៃផ្សេងទៀត ជុំវិញការទិញយន្តហោះចម្បាំង ។ ក្រិកក៏បាននិងកំពុងតែព្យាយាមអស់ រយៈពេលជាងមួយទសវត្ស ដើម្បីពង្រឹងនិងធ្វើឯកជន ភាវូបនីយកម្ម ចំពោះក្រុមហ៊ុនការពារជាតិ ដែលមានការខាតបង់ផងដែរ ៕ប្រែសម្រួល៖ប៉ាង កុង
