ភ្នំពេញ ៖លោក ស សុខា រដ្ឋលេខាធិការនៃក្រសួងអប់រំ យុវជន និងកីឡា និងប្រធានសហព័ន្ធកីឡាប៊ូល និងប៉េតង់កម្ពុជា នារសៀលថ្ងៃទី២៧ ខែវិច្ឆិកា ឆ្នាំ២០១៩បានជួបសំណេះសំណាល ជាមួយក្រុមគ្រូបង្វឹក កីឡាករ-កីឡាការិនីប៊ូល និងប៉េតង់កម្ពុជាត្រៀម ចូលរួមការប្រកួត SEA GAMES ២០១៩ លើកទី៣០ ដែលប្រទេសហ្វីលីពីនយើងធ្វើជាម្ចាស់ផ្ទះ ចាប់ពីថ្ងៃទី៣០ ខែវិច្ឆិកាដល់ថ្ងៃទី១១ ខែធ្នូ ឆ្នាំ២០១៩ ខាងមុខនេះនៅសាលប្រជុំ “ក”ក្នុងបជ្ឈមណ្ឌលជាតិ ហ្វឹកហាត់កីឡា។
លោក ស សុខាបានមានប្រសាសន៍ថា ការប្រកួតកាន់តែ ខិតជិតមកដល់ ហើយនៅសល់តែប៉ុន្មានថ្ងៃទៀតទេ ដូច្នេះកីឡាករ-កីឡាការិនីត្រូវប្រយ័ត្នប្រយែង ការហូបចុក និងថែទាំសុខភាពឲ្យបានល្អ ព្រមទំាងខិតខំហ្វឹកហាត់ បន្ថែមទៀត ត្រូវធ្វើការប្រកួតឲ្យអស់ សមត្ថភាពដូចការប្រកួត នៅក្រៅប្រទេសដែរ។ ក្នុងឳកាសជួបសំណេះសំណាល លោក ស សុខា ប្រធានសហព័ន្ធកីឡាប៊ូល និងប៉េតង់កម្ពុជាបាន ឧបត្ថម្ភដល់គ្រូបង្វឹក កីឡាករ-កីឡាការិនីក្នុងមួយម្នាក់ ទឹកប្រាក់ចំនួន៣០០ដុល្លារ។
សម្រាប់កម្ពុជាបានបញ្ជូន ប្រតិភូ គ្រូបង្វឹក គ្រូជំនួយ និងកីឡាករ-កីឡាការិនីប៉េតង់ចំនួន១៧នាក់ ក្នុងនោះប្រតិភូ ឲ១នាក់ គ្រូបង្វឹក គ្រូជំនួយចំនួន៤នាក់ កីឡាករចំនួន៦នាក់ និងកីឡាការិនីចំនួន៦នាក់ ចំពោះកីឡាករទំាង៦នាក់ កីឡាករ សុខ ចាន់មាន កីឡាករ ញ៉ែម បូរ៉ា កីឡាករ ថោង ឈឿង កីឡាករ តិប នរ៉ា កីឡាករ សៀង វណ្ណា និងកីឡាករ យឹម សុភណ្ឌ ចំណែកកីឡាករ សុខ ចាន់មាន កីឡាករ ញ៉ែម បូរ៉ា ប្រកួតលើកវិញ្ញាសា វាយគូបុរស២ទល់២នាក់ រីឯកីឡាករ ថោង ឈឿង កីឡាករ តិប នរ៉ា កីឡាករ សៀង វណ្ណា និងកីឡាករ យឹម សុភណ្ឌ ប្រកួតលើកវិញ្ញាសាវាយបុរស ៣ទល់៣នាក់ ហើយគូ្របង្វឹកវិញ លោក អ៊ឹម ជាតិ គ្រូធំ និងលោក ជ័រ គឹមឈុន គ្រូជំនួយ។
ដោយឡែកកីឡាការិនីទាំង៦នាក់រួមមាន កីឡាការិនីកែ ឡេង ជាម្ចាស់មេដាយមាស ជើងឯកពិភពលោក៤សម័យកាល កីឡាការិនីអ៊ុក ស្រីមុំ កីឡាការិនី អ៊ុន ស្រីយ៉ា និង កីឡាការិនី ស្រ៊ាង សុរ៉ាឃីម កីឡាការិនី ឃួន យ៉ារី និង កីឡាការិនី ដួងឌីណា ហើយលោក សុខ ម៉ុង គ្រូបង្វឹក និងអ្នកស្រី អ៊ុក លក្ខណា គ្រូជំនួយ៕ ដោយ៖លី ភិលីព
