ភ្នំពេញៈ ការនាំចេញសរុបរបស់តំបន់សេដ្ឋកិច្ចពិសេសចំនួន៤ ដែលមានមូលដ្ឋាននៅខេត្តស្វាយរៀង សម្រេចបានទំហំទឹកប្រាក់ជាង៦៨០លានដុល្លារ ក្នុងរយៈពេល៨ខែដើមឆ្នាំ២០២០ ។ នេះបើយោងតាមការទិន្នន័យចុងក្រោយ របស់ក្រសួងពាណិជ្ជកម្ម។
ការនាំចេញរបស់កម្ពុជា តាមរយៈតំបន់សេដ្ឋកិច្ចពិសេស ដែលមូលដ្ឋាននៅក្នុងខេត្តស្វាយរៀង ក្នុងខែសីហា មានទំហំទឹកប្រាក់ ១២៧.៨៧លានដុល្លារ កើនឡើងជាង ៥៧ លានដុល្លារ បើធៀបនឹងកក្កដា។
ផលិតផលនាំចេញភាគច្រើនគឺសម្លៀកបំពាក់ កង់ ស្បែកជើង និងគ្រឿងបន្លាស់រថយន្តជាដើម ហើយទំនិញទាំងនេះភាគច្រើន ត្រូវបាននាំចេញទៅអឺរ៉ុប និងអាមេរិក។
ស្វាយរៀងគឺជាខេត្តមួយ ក្នុងចំណោមខេត្ត ដែលមានច្រករបៀងសេដ្ឋកិច្ចសំខាន់ ដោយបច្ចុប្បន្នមានច្រកព្រំដែនអន្តរជាតិថ្មីមួយ រំពឹងថានឹងបើកដំណើរការនៅពេលឆាប់ៗ ដើម្បីជំរុញវិស័យពាណិជ្ជកម្ម និងទេសចរណ៍។
លោករស់ ផារិទ្ធ អភិបាលរងខេត្តស្វាយរៀងបានឱ្យដឹងថា កាលពីសម័យមុន ខេត្តស្វាយរៀង ពុំដែលមានតំបន់សេដ្ឋកិច្ចពិសេស រោងចក្រ សហគ្រាស ដូចបច្ចុប្បន្ននេះទេ ទើបតែសម័យតេជោ ក្រោមដំបូលនៃម្លប់សុខសន្តិភាព បានធ្វើឱ្យខេត្តស្វាយរៀងមានរោងចក្រ សហគ្រាសជាច្រើនកន្លែង រហូតមានរោងចក្រដំឡើងរថយន្ត នៅក្រុងបាវិត ក្នុងតំបន់សេដ្ឋកិច្ចពិសេស Intervior Automobile Industry Complex របស់ក្រុមហ៊ុន Deahan Auto ។
លោកបន្តថា បច្ចុប្បន្ននេះ ដោយសារផលប៉ះពាល់នៃជំងឺ Covid-19 ដែលបាននឹងកំពុងរីករាលដាលនៅទូទាំងពិភពលោក ក៏ដូចជានៅក្នុងប្រទេសកម្ពុជាផងដែរ បាននាំឱ្យមានផលប៉ះពាល់ដល់ដំណើរការអភិវឌ្ឍសេដ្ឋកិច្ចសង្គម ជាពិសេសប៉ះពាល់ដល់ការងារកម្មករនិយោជិតមួយចំនួន ដោយសាររោងចក្រមួយចំនួនបានព្យួរការងារ។
លោកបន្ថែមថា ខេត្តស្វាយរៀង មានក្រុមហ៊ុន រោងចក្រ សហគ្រាស គ្រឹះស្ថានឯកជន ធនាគារ គ្រឹះស្ថានមីក្រូហិរញ្ញវត្ថុ សុរបចំនួន ២១៦កន្លែង នៅក្នុងនោះរោងចក្រសហគ្រាសចំមួន១១៣ កន្លែង បានបង្កើតការងារធ្វើជូនប្រជាពលរដ្ឋប្រមាណ៨ម៉ឺននាក់ រួមចំណែកលើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ៕ប្រភព៖propertyarea
