ភ្នំពេញៈ រដ្ឋាភិបាលកម្ពុជា តាមរយៈក្រសួងពាណិជ្ជកម្មបាន និងកំពុងរៀបចំយុទ្ធសាស្ត្រ ក្នុងការទាញយកផលប្រយោជន៍ឱ្យបានកាន់តែច្រើនបំផុត ពីកិច្ចព្រមព្រៀងពាណិជ្ជកម្មសេរី FTA ដែលនឹងចាប់អនុវត្តនៅក្នុងពេលដ៏ខ្លីឆាប់ៗខាងមុខនេះ។
រដ្ឋលេខាធិការក្រសួងពាណិជ្ជកម្ម លោក ស៊ាង ថៃ បានមានប្រសាសន៍នៅថ្ងៃចុងសប្ដាហ៍កន្លងទៅនេះថា ដោយអនុវត្តតាមការចង្អុលបង្ហាញដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា រដ្ឋមន្ត្រីក្រសួងពាណិជ្ជកម្ម បានណែនាំឱ្យក្រុមការងារ រៀបចំយុទ្ធសាស្ត្រទាញយកផលប្រយោជន៍ ជាអតិបរមាពីការអនុវត្តកិច្ចព្រមព្រៀងពាណិជ្ជកម្មសេរីដែលកម្ពុជាជាហត្ថលេខី។
លោកបានបន្តថា “ពេលនេះក្រុមការងារសិក្សាស្រាវជ្រាវ ត្រូវបានបង្កើតឡើងដើម្បីសិក្សាស្រាវជ្រាវ និងរៀបចំយុទ្ធសាស្ត្រជម្រុញ ការនាំចេញតាមសេចក្តីប្រកាស លេខ ២៩១ ព.ណ.អប.ប្រកស្តីពី ការកែសម្រួលក្រុមការងាររៀបចំគោលនយោបាយ និងយុទ្ធសាស្ត្រចរចាបង្កើតកិច្ចព្រមព្រៀងពាណិជ្ជកម្មសេរី” ។
ក្រុមការងារជំនាញ បានសិក្សាស្រាវជ្រាវលើលទ្ធភាពទំនិញចំនួន៩មុខ រួមមានដូចជា វិស័យសម្លៀកបំពាក់ វិស័យស្បែកជើង តំបន់សេដ្ឋកិច្ចពិសេស វិស័យដំឡើងកម្មន្តសាលធុនស្រាល វិស័យចំណីអាហារកែច្នៃ វិស័យជលផល វិស័យអង្ករវិស័យដំឡូងមី និងកៅស៊ូធម្មជាតិ ដើម្បីជម្រុញការនាំចេញទៅកាន់ប្រទេសចិន និងលក្ខខណ្ឌច្រកចូលទីផ្សារប្រទេសចិន ហើយបានធ្វើការសិក្សា អំពីទំហំពាណិជ្ជកម្មក្នុងពិភពលោក ការនាំចេញរបស់កម្ពុជាទៅកាន់ទីផ្សារពិភពលោក និងទៅកាន់ទីផ្សារប្រទេសនាំចូលធំៗ ដែលជាដៃគូពាណិជ្ជកម្ម ជាពិសេសគឺការសិក្សា និងវិភាគអំពីចំនុចខ្លាំង ចំនុចខ្សោយ ឱកាស ការគំរាមកំហែង (SWOT Analysis) ដើម្បីកំណត់ថាទំនិញណាជាផលិតផលថ្មី ផលិតផលកំពុងលូតលាស់ ផលិតផលមានភាពចាស់ទុំ ដើម្បីមានភាពងាយស្រួយធ្វើការជម្រុញការនាំចេញបន្ថែមទៀត។
លើសពីនេះ ក្រុមការងារក៏បានសិក្សាអំពីរបបពន្ធ (ពន្ធគយនាំចូល) ទៅតាមប្រភេទនៃកិច្ចព្រមព្រៀងពាណិជ្ជកម្មពហុភាគី (MFN) តាមកិច្ចព្រមព្រៀងពាណិជ្ជកម្មសេរីអាស៊ានចិន (ACFTA) តាមភាពអនុគ្រោះពិសេសម្រាប់កម្ពុជា Preferential tariff for Cambodia (China’s Special preferential duty) និងតាមឋានៈប្រទេស ដែលមាន ការអភិវឌ្ឍន៍តិចតួច (LDC) ដើម្បីពិនិត្យមើលការនាំចេញ តាមកិច្ចព្រមព្រៀងមួយណា ដើម្បីទទួលភាពអនុគ្រោះបំផុត និងបានសិក្សាផងដែរ ចំពោះរបាំងបច្ចេកទេសរបស់ប្រទេសចិនក្នុងការនាំចូលចំពោះទំនិញនីមួយ។
លោកបណ្ឌិតហុង វណ្ណៈអ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជាបានមានប្រសាសន៍ថា ឆ្នាំ២០២១ខាងមុខនេះ កិច្ចព្រមព្រៀងជាច្រើននឹងចូលជាធរមាន ដែលផ្តល់កាលានុវត្តន៍ភាព ក្នុងការនាំចេញទំនិញពីកម្ពុជាទៅកាន់ប្រទេសជាច្រើន ពិសេសប្រទេសចិន ប៉ុន្តែអ្វីដែលជាបញ្ហាប្រឈមរបស់យើង តើកម្ពុជាមានទំនិញគ្រប់គ្រាន់មានគុណភាព សុវត្ថិភាព និងភូតគាមអនាម័យគ្រប់គ្រាន់ដើម្បីនាំចេញឬអត់។
លោកបន្តថា “ភូត្តគាមអនាម័យ សុវត្ថិភាពផលិតផលរបស់យើង ជាបញ្ហាដែលគួរឲ្យបារម្ភ អ្វីជាសំណួរនៅទីនេះថា តើយើងមានទំនិញបានច្រើនប៉ុណ្ណាដែលអាចនាំចេញទៅប្រទេសចិន និងប្រទេសជាច្រើនទៀត” ៕ប្រភព៖propertyarea.asia
