ព្រឹត្តិការណ៍

ខេត្ត​ចំនួន៥ នៅតែ​បន្ត​ទាក់ទាញ ​ការវិនិយោគ ​លើ​វិស័យ​ឧស្សាហកម្ម និង​អចលនទ្រព្យ

ភ្នំពេញៈ របាយការណ៍​របស់​ខេត្ត និង​រដ្ឋាភិបាល​បានបង្ហាញ​ថា ក្នុងចំណោម​ខេត្ត ក្រុង​ទាំង២៥ គេ​សង្កេតឃើញ​មាន​ខេត្ត​ចំនួន៥ នៅតែមាន​សកម្មភាព​វិនិយោគ និង​ដំណើរការ​ក្នុង​វិស័យ​ឧស្សាហកម្ម និង​គំរោង​អភិវឌ្ឍន៍​លើ​វិស័យ​ អចលនទ្រព្យ​កាន់់តែច្រើន ។

នៅក្នុង​កំឡុង​ពេលដែល​កម្ពុជា កំពុង​ប្រឈម​ជាមួយ​វិបត្តិ​សេដ្ឋកិច្ច​សាកល ដែល​បណ្តាលមកពី​ការរីក​រាលដាល នៃ​ជំងឺឆ្លង covid-19 ក្រៅពី​វិស័យ​ ទេសចរណ៍ ដែល​ទទួលរង​នូវ​ផលប៉ះពាល់​យ៉ាងធ្ងន់ធ្ងរ​នោះ សម្រាប់​វិស័យ​ឧស្សាហកម្ម រោងចក្រ​កាត់ដេរ​នៅ​កម្ពុជា ពិតជា​ទទួលរង​នូវ​ផលប៉ះពាល់​មួយផ្នែក​ដែរ ប៉ុន្តែ​នៅក្នុង​ដំណាក់កាល​នេះ​ក៏មាន​វត្តមាន​រោងចក្រថ្មីៗទើប​បង្កើតឡើង ក្រោយ​ការទទួលបាន​សេចក្ដីសម្រេច​គាំទ្រ ពី​រដ្ឋាភិបាល តាមរយៈ​ក្រុមប្រឹក្សា​អភិវឌ្ឍន៍​កម្ពុជា ​ជិត១០០ក្រុមហ៊ុន ។ នេះ​បើ​យោង តាម​ការបង្ហាញ​រប​ស់ CDC កាលពីពេល​កន្លងទៅនេះ។

ជាមួយគ្នានេះ តាមរយៈ​ការបង្ហាញ​នូវ​របាយការណ៍ ពី​រដ្ឋបាលខេត្ត​នៅត្រឹម​ដើម​ត្រីមាស​ទី៣ គេ​កត់សម្គាល់​ក្នុង​ចំនួន​ខេត្ត​ក្រុង​ទាំង២៥ ក្នុងនោះ​មាន​ខេត្ត​ចំនួន៤នៅតែ​បង្ហាញ​ពី​សម្មភាព​នៃ​ការវិនិយោគ​ដដែល ជាពិសេស​ក្នុង​វិស័យ​ឧស្សាហកម្ម និង​សំណង់ ដោយ​ខេត្ត​ទាំង៤នេះ​រួមមាន ៖

ទី១- ខេត្តកំពង់ស្ពឺ

ដោយសារ​មាន​ទីតាំង​ជាប់​រាជធានី​ភ្នំពេញ និង​មាន​ហេ​ដ្ឋា​រចនា​ស​ម្ព័​ន្ឋ​ឆ្លងកាត់​ខ្វាត់ខ្វែង​ច្រើនជាងគេ ខេត្ត​នេះ​បាន​ទាក់ទាញ​គំរោង​រោងចក្រ ឧស្សាហកម្ម និង​គំរោង​អភិវឌ្ឍន៍​អចលនទ្រព្យថ្មីៗជាច្រើន ទាំង​ផ្នែក​ដីឡូត៍ លំនៅដ្ឋាន​តម្លៃ​មធ្យម និង​គម្រោង​ង​ម​ជ្ឈ មណ្ឌល​ពាណិជ្ជកម្ម​នានា។

តាម​របាយការណ៍​រប​ស់​អាជ្ញាធរខេត្ត​បាន​ឲ្យ​ដឹងថា ខេត្ត​នេះ​មាន​រោងចក្រ​កាត់ដេរ សហគ្រាស​ខ្នាតតូច និង​មធ្យម​សរុប​មាន​ចំនួន២៦១គម្រោង ដោយ​ក្នុងនោះ​កំពុងតែ​ដំណើរការ​សង្វាក់​ផលិតកម្ម មាន​ចំនួន១៦១ ហើយ​គម្រោង​ចំនួន១០០ទៀត កំពុងតែ​ដើរ​តាម​នីតិវិធី និង​ត្រៀម​ដំណើរការ​ក្នុងពេល​ខាងមុខនេះ។

ជាមួយនឹង​ដំណើរការ​ផលិតកម្ម របស់​រោងចក្រ​កាត់ដេរ​សម្លៀកបំពាក់ រោងចក្រ​កាត់​ស្បែកជើង រោងចក្រ​កាបូប រោងចក្រ​ផលិត​គ្រឿងអគ្គិសនី រោងចក្រ​ផលិត​សម្ភារៈ​សំណង់ រួមជាមួយ​នឹង​បណ្តា​សហគ្រាស​នានា​ទាំងអស់នេះ បានផ្តល់​ចំណូល​ដល់​ប្រជាពលរដ្ឋ​ក្នុង​តំបន់ ក៏ដូចជា​ជា​ចំណាក​មកពី​បណ្តា​ខេត្ត​ដទៃទៀត ស្មើនឹង​ប្រមាណ​ជាង៣០លាន​ដុល្លារ តាមរយៈ​ការផ្តល់​ឱកាស​ការងារ​ជាប្រចាំ​ខែ។

ទី២ ខេត្តស្វាយរៀង

ខេត្ត​មាន​ព្រំប្រទល់​ជាប់​ប្រទេស​វៀតណាម​នេះ ក៏​ជាតី​តាំង​ទាក់ទាញ​ការវិនិយោគ​លើ​រោងចក្រ សហគ្រាស​ជាច្រើន​ផងដែរ។

ខេត្ត​នេះ​មាន​ក្រុមហ៊ុន រោងចក្រ សហគ្រាស គ្រឹះស្ថាន​ឯកជន ធនាគារ គ្រឹះស្ថាន​មីក្រូហិរញ្ញវត្ថុ សុ​រប​ចំនួន២១៦កន្លែង នៅ​ក្នុងនោះ​រោងចក្រ​សហគ្រាស​ចំ​មួន ១១៣កន្លែង បាន​បង្កើត​ការងារ​ធ្វើ​ជូន​ប្រជាពលរដ្ឋ​ប្រមាណ៨ម៉ឺន​នាក់ ដោយបាន​រួមចំណែក​លើ​ក​កម្ពស់​ជីវភាព​រស់​នៅ និង​កាត់បន្ថយ​ភាពក្រីក្រ​របស់​ប្រជាពលរដ្ឋ។

នៅក្នុង​ខេត្តស្វាយរៀង មាន​តំបន់​សេដ្ឋកិច្ច​ពិសេស​ចំនួន១១ ប៉ុន្តែ​តំបន់​សេដ្ឋកិច្ច​ដែល​ដំណើរការ​មាន​ចំនួន៨ទីតាំង។

ទី៣- ខេត្តកំពង់ចាម

ជា​ខេត្ត​ស្ថិតនៅ​តំបន់​ទំនាប​កណ្តាល ជាប់​ដង​ទន្លេមេគង្គ ខេត្ត​នេះ​មានការ​មើលរ​រំលង​ង​ពី​អ្នកវិនិយោគ​មួយចំនួន ប៉ុន្តែ​ការពិត​ខេត្ត​នេះ​ក៏មាន​រោងចក្រ​ធុន​ធំ​ចំនួន១៧មូលដ្ឋាន (រោងចក្រ​កាត់ដេរ​កែច្នៃ​ជ័រកៅស៊ូ) ហើយ​រោងចក្រ​ធុន​មធ្យម​ចំនួន១៣៥មូលដ្ឋាន (ផលិត​ទឹក​សុទ្ធ ម៉ាស៊ីនកិនស្រូវ កែច្នៃ​ជ័រកៅស៊ូ) ក្រៅពីនេះ​មាន​សិប្បកម្ម​លក្ខណៈ​គ្រួសារ មាន​ចំនួន១១៩៤មូលដ្ឋា​ន (ការធ្វើ​អាជីវកម្ម​លក្ខណៈ​គ្រួសារ ផលិត​ដប​ទឹក​សុទ្ធ ទឹក​សុទ្ធ កាត់​កញ្ចក់ ផ្សារ​ដែក ជាដើម)។

ទី៤- ខេត្ត​ព្រះសីហនុ

ជា​តំបន់​អភិវឌ្ឍន៍​សេដ្ឋកិច្ច​បែប​ពហុ​បំណង និង​ស្ថិតនៅក្នុង​គំរោង​អភិវឌ្ឍន៍​ខ្សែក្រវ៉ាត់១ ផ្លូវ១របស់​ចិន ខេត្ត​ព្រះសីហនុ​កំពុង​ឈានមុខ​គេ បន្ទាប់ពី​រាជធានី​ភ្នំពេញ។

ខេត្ត​នេះ មាន​តំបន់​សេដ្ឋកិច្ច​ពិសេស​ចំនួន១០ទីតាំង ស្ថិតនៅលើ​ផ្ទៃដី​ប្រមាណ២៥៨៦,២៦ហិកតា ដែលមាន​ទំហំ​ទុនវិនិយោគ​សរុប​ជាង១៤៨១លាន​ដុល្លារ ក្នុងនោះ​មាន៤ទីតាំង​កំពុងដំណើរការ​យ៉ាងសកម្ម ហើយ៦ទីតាំង​ទៀត​កំពុង​សាងសង់។

នៅក្នុង​តំបន់​សេដ្ឋកិច្ច​ពិសេស ដែលមាន​ដំណើរការ​ខាងលើនេះ មាន​វត្តមាន​រោងចក្រ សហគ្រាស​សរុប​ចំនួន១៥១រោងចក្រ ហើយ​ចំនួន៦៦រោងចក្រ​ផ្សេងទៀត កំពុង​ដំណើរ​នៅក្រៅ​តំបន់​សេដ្ឋកិច្ច​ពិសេស។

ទី៥ ខេត្តបន្ទាយមានជ័យ

មាន​ព្រំប្រទល់​ជាប់​នឹង​ប្រទេស​ថៃ ខេត្តបន្ទាយមានជ័យ​ក៏មាន​សក្តានុពល មិន​ចាញ់​បណ្តា​ខេត្ត ដែលមាន​ការរីកចម្រើន​ដទៃទៀត​ដែរ ពិសេស​ខេត្ត​នេះ​មាន​ព្រំប្រទល់​ជាប់​នឹង​ប្រទេស​ថៃ មាន​ច្រកទ្វារ​អន្តរជាតិ​ចំនួន​ពីរ ដែល​ទាក់ទាញ​ការវិនិយោគ​ពី​ប្រទេសជិតខាង​នេះ ពិសេស​ទាក់ទាញ​គំរោង​វិនិយោគ​របស់​ជប៉ុន និង​អ្នកវិនិយោគ​មកពី​ប្រទេស​ជាច្រើន​ទៀត។ ខេត្ត​នេះ​មាន​តំបន់ឧស្សាហកម្ម​ប្រមាណ១០ទីតាំង ដែលមាន​រោងចក្រ សហគ្រាស​ជាច្រើន ដែលជា​ទីតាំង​ផលិត ដើម្បី​ធ្វើការ​នាំចេញ​ទៅកាន់​ប្រទេស​ដ​ថៃ ដែលជា​មូលដ្ឋាន​នាំចេញ ឬ​ជា​ច្រក​សេដ្ឋកិច្ច​ធំ​មួយ​សម្រាប់​កម្ពុជា។

ក្រុង​ប៉ោង​ប៉ែត មុនពេល​មាន​វិបត្តិ​ជំងឺ​កូ​វីដ១៩ ក៏មាន​ការរីកចម្រើន និង​ទាក់ទាញ​ការវិនិយោគ​យ៉ាង​សម្បើម​ផងដែរ​លើ​ផ្នែក​អចលនទ្រព្យ សណ្ឋាគារ កាស៊ីណូ ផ្សារ​ទំនើប និង​មជ្ឈមណ្ឌល​ពាណិជ្ជកម្ម​ជាច្រើន​ទៀត ៕ propertyarea.asia

Most Popular

To Top