ភ្នំពេញ ៖ លោកស្រី ហង់ ស៊ីមន អគ្គលេខាធិការសហព័ន្ធកីឡារាំកម្ពុជា និងជាអនុប្រធានមជ្ឈមណ្ឌលជាតិហ្វឹកហ្វឺនកីឡា បានប្រាប់ឲ្យដឹង កីឡាករ-កីឡាការិនីរាំកម្ពុជា ដណ្តើមបានមេដាយមាស ៤ គ្រឿង មេដាយប្រាក់ ១ គ្រឿង និងមេដាយសំរិទ្ធក្នុងព្រឹត្តិការណ៍ការប្រកួតកីឡារាំ Open events Junior ដែលប្រព្រឹត្តចាប់ពីថ្ងៃទី២៣ និង២៤ ខែកក្កដា ឆ្នាំ២០២៦ នៅប្រទេសម៉ាឡេស៊ី ។
លោកស្រី អគ្គលេខាធិការសហព័ន្ធកីឡារាំកម្ពុជា បានបន្តថា នាថ្ងៃទី២៥ ខែកក្កដា ឆ្នាំ២០២៦ កីឡាករ-កីឡាការិនីរាំកម្ពុជាធ្វើការប្រកួតលើវិញ្ញាសារប្រកួត Adult Asian Championship Ten Dances និងនិងថ្ងៃទី២៦ វិញ្ញាសាប្រកួត SouthEast Asia Adult Female solo ក្នុងព្រឹត្តិការណ៍ការប្រកួតកីឡារាំ The 5th WDSF ASIAN – SOUTH EAST ASIAN Dance Sport Cham pionship 2026 នៅប្រទេសម៉ាឡេស៊ី។
លោកស្រី អនុប្រធានមជ្ឈមណ្ឌលជាតិហ្វឹកហ្វឺនកីឡា បានបញ្ជាក់ថា សហព័ន្ធបានបញ្ជូនប្រតិភូ ចៅក្រម គ្រូបង្វឹក គ្រូជំនួយ និងកីឡាករ-កីឡាការិនីកីឡារាំ របស់ខ្លួនចំនួន២២ នាក់រួមមាន លោកសី បាន សុជាតិ ជាប្រធានប្រតិភូ អ្នកគ្រូ You Shu Jie ចៅក្រម លោកស៊ូវ តុង ជាគ្រូបង្វឹកធំ លោក សួន កូស៊ុល ជាគ្រូជំនួយ កីឡាករ -កីឡាការិនីចំនួន ១៨ នាក់ ក្នុងនោះកីឡាករចំនួន ៨ នាក់ និងកីឡាការិនីចំនួន ១០ នាក់ ។ កីឡាករ -កីឡាការិនីចំនួន ១៨ នាក់នេះមានកីឡាករ -កីឡាការិនីស្ថិតនៅក្រុមជម្រើសជាតិឆ្នាំ២០២៦ ចំនួន ១០ នាក់ក្នុងនោះកីឡាករចំនួន ៥ នាក់ និងកីឡាការិនីចំនួន ៥ នាក់ ។ កីឡាករ -កីឡាការិនីសហព័ន្ធកីឡារាំមានចំនួន ៨ នាក់ រួមមានកីឡាករចំនួន ៣ នាក់ និងកីឡាការិនីចំនួន ៥ នាក់។
លោកស្រី ហង់ ស៊ីមន បន្ថែមទៀតថា បេសកកម្មអន្តរជាតិនេះ ប្រតិភូកីឡារាំកម្ពុជាទទួលបានការឧបត្ថម្ភប្រាក់ហោប៉ៅពីក្រសួងអប់រំ យុវជន និងកីឡា រីឯការចំណាយលើថ្លៃសំបុត្រយន្តហោះទៅមកក្រោមការឧបត្ថម្ភពីក្រុមហ៊ុន AirAsia និងក្រុមហ៊ុន វឌ្ឍនៈ និងក្រុម ហ៊ុន វិរៈប៊ុនថាំ ក៏បានជួបឧបត្ថម្ភ ស្របពេលដែលលោកស្រី ញ៉ែម មរតក ជាប្រធានសហព័ន្ធតែងតែប្រឹងប្រែងក្នុងកិច្ចការដំណើរការអភិវឌ្ឍន៍ជំនាញកីឡារបស់កម្ពុជាមួយនេះ៕
