បរទេស ៖ ព្រះអង្គម្ចាស់ Harry (Prince Harry) តែងតែជាបុគ្គលសាធារណៈដែលទទួលបានការចាប់អារម្មណ៍យ៉ាងខ្លាំងពីពិភពលោក តាំងពីទ្រង់ប្រសូត រហូតមកដល់បច្ចុប្បន្ន ។ ពីកុមារភាព ដែលធំដឹងក្តីក្នុងរាជវាំងអង់គ្លេស ជីវិតជាយោធា រហូតដល់ការសម្រេចចិត្តដ៏រញ្ជួយ ពិភពលោក ក្នុងការចាកចេញពីតួនាទីជារាជវង្ស ខ្សែជីវិតរបស់ទ្រង់ពោរពេញ ទៅដោយរឿងរ៉ាវគួរឱ្យកត់សម្គាល់ នេះបើយោងតាមការចេញផ្សាយពីសារព័ត៌មាន Hollywood life ថ្ងៃទី ១៥ ខែកញ្ញា ឆ្នាំ២០២៦ ។
ខាងក្រោមនេះ គឺជាដំណាក់កាលសំខាន់ៗ នៃខ្សែជីវិតរបស់ព្រះអង្គម្ចាស់ Harry ឆ្លងកាត់ពេលវេលាជាច្រើនឆ្នាំ
១. កុមារភាព និងការបាត់បង់ដ៏ធំធេង
ព្រះអង្គម្ចាស់ Harry ប្រសូតនៅឆ្នាំ ១៩៨៤ ជាបុត្រាទី ២ របស់ព្រះបាទ Charles ទី ៣ និងព្រះនាង Diana។ រូបភាពកាលពីកុមារភាពរបស់ទ្រង់ តែងតែបង្ហាញពីស្នាមញញឹម ដ៏ស្រស់សើច និងភាពស្និទ្ធស្នាលយ៉ាងខ្លាំងជាមួយព្រះមាតា។ យ៉ាងណាមិញ ព្រឹត្តិការណ៍ដ៏សោកសៅបំផុត បានកើតឡើងនៅឆ្នាំ ១៩៩៧ នៅពេលដែលព្រះនាង Diana បានសោយទិវង្គត ក្នុងគ្រោះថ្នាក់ចរាចរណ៍ ដែលបន្សល់ទុកនូវការឈឺ ចាប់យ៉ាងជ្រាលជ្រៅសម្រាប់ Harry ដែលកាលនោះមានព្រះជន្មទើបតែ ១២ ព្រះវស្សា។
២. ជីវិតក្នុងជួរកងទ័ព និងសកម្មភាពមនុស្សធម៌
នៅពេលធំពេញវ័យ ព្រះអង្គម្ចាស់ Harry បានសម្រេចចិត្តចូលបម្រើក្នុងជួរកងទ័ពអង់គ្លេស ដោយបានចំណាយពេលអស់ ១០ ឆ្នាំ និងធ្លាប់បានចុះទៅបំពេញបេសកកម្មផ្ទាល់នៅសមរភូមិប្រទេសអាហ្វហ្គានីស្ថាន (Afghanistan)។ ក្នុងឯកសណ្ឋានយោធា ទ្រង់ទទួលបានការគោរពយ៉ាងខ្លាំងពីប្រជាជន។ លើសពីនេះ នៅឆ្នាំ ២០១៤ ទ្រង់បានបង្កើតព្រឹត្តិការណ៍កីឡាអន្តរជាតិ Invictus Games ដែលជាការប្រកួតកីឡាសម្រាប់យោធិនពិការ និងរងរបួស ដើម្បីផ្តល់កម្លាំងចិត្តដល់ពួកគេ។
៣. អាពាហ៍ពិពាហ៍ និងការកសាងគ្រួសារ
ទំព័រជីវិតថ្មីរបស់ព្រះអង្គម្ចាស់ Harry បានចាប់ផ្តើមនៅពេលដែលទ្រង់បានជួប និងរៀបអភិសេកជាមួយអតីតតារាសម្តែងអាមេរិក Meghan Markle នៅខែឧសភា ឆ្នាំ ២០១៨ ដែលពិធីនេះមានការតាមដានទស្សនាពីមនុស្សរាប់លាននាក់ទូទាំងពិភពលោក។ បច្ចុប្បន្ន គ្រួសារដ៏កក់ក្តៅនេះមានបុត្រចំនួន ២ អង្គ គឺព្រះអង្គម្ចាស់ Archie និងព្រះនាង Lilibet។
៤. ការចាកចេញពីរាជវង្ស (Megxit) និងជីវិតថ្មីនៅអាមេរិក
នៅឆ្នាំ ២០២០ ព្រះអង្គម្ចាស់ Harry និងអ្នកនាង Meghan បានធ្វើឱ្យពិភពលោកភ្ញាក់ផ្អើលយ៉ាងខ្លាំង តាមរយៈការប្រកាសដកខ្លួនពីតួនាទីជាសមាជិករាជវង្សជាន់ខ្ពស់ និងឈប់ទទួលប្រាក់ឧបត្ថម្ភពីរដ្ឋ។ ពួកគេបានផ្លាស់ទីលំនៅទៅរស់នៅរដ្ឋកាលីហ្វ័រញ៉ា សហរដ្ឋអាមេរិក ដើម្បីស្វែងរកឯករាជ្យភាពហិរញ្ញវត្ថុ និងជីវិតឯកជន។ ចាប់តាំងពីពេលនោះមក ទ្រង់បានចូលរួមក្នុងគម្រោងធំៗជាច្រើន រួមទាំងការបោះពុម្ពសៀវភៅកំណត់ហេតុផ្ទាល់ខ្លួនចំណងជើងថា “Spare” ដែលទម្លាយរឿងរ៉ាវអាថ៌កំបាំងជាច្រើនក្នុងរាជវាំង។
ទោះបីជាមានការផ្លាស់ប្តូរ និងរងសម្ពាធជាច្រើនក្តី ព្រះអង្គម្ចាស់ Harry នៅតែបន្តផ្តោតលើការងារមនុស្សធម៌ និងការលើកកម្ពស់ការយល់ដឹងអំពីសុខភាពផ្លូវចិត្ត (Mental Health) យ៉ាងសកម្ម។
ប្រែសម្រួល៖ គីរី
