លោក Dan Tillery តារាចម្រៀងមួយរូប ដែលទើបតែផ្លាស់មករស់នៅ ទីក្រុង Waterford រដ្ឋ New Jersey សហរដ្ឋអាមេរិក បានរស់នៅជាមួយសត្វសុនខរបស់ខ្លួន ដែលមានឈ្មោះថា Diggy សុខៗ ក៏ត្រូវបានអ្នកជិតខាង តេប្ដឹងប៉ូលិស។ នេះបើយោងតាមការចុះផ្សាយរបស់ Daily Mail ។
រឿងរ៉ាវនេះកើតឡើង តាំងពីឆ្នាំ២០១៦មកម្ល៉េះ ដោយលោក Dan បានទើបផ្លាស់ទៅរស់នៅផ្ទះ នៅទីតាំងខាងលើ ដោយបានសុំសិទ្ធចិញ្ចឹមសត្វសុនខមួយ ពីមណ្ឌលថែទាំសត្វមួយកន្លែង។ លោក Dan បានស្រលាញ់ពេញចិត្ត នឹងសុនខរបស់លោក ដែលមានឈ្មោះថា Diggy នោះជាខ្លាំង ដោយបានលេងប្រលែងជាមួយគ្នា ព្រមទាំងបានបង្ហោះរូបភាព និងសកម្មភាពនានា ថតជាមួយ Diggy នៅបណ្ដាញសង្គមរបស់លោក ដោយទទួលបានចូលមើល គាំទ្រជាច្រើន។
ក្រោយមានភាពល្បីល្បាញបែបនេះ ក៏បានដឹងឮដល់អ្នកជិតខាង របស់លោក Dan ដែលរស់នៅទីក្រុងជាមួយគ្នា ហើយអ្នកជិតខាងរបស់លោក ក៏បានតេប្ដឹងប៉ូលិស ដោយសារតែពួកគេ បានចោទថា សត្វសុនខ ដែលលោក Dan ចិញ្ចឹមនោះ ជាប្រភេទសុនខពូជ Pit Bull ដែលជាប្រភេទសុនខ មានភាពកាចសាហាវ បង្កគ្រោះថ្នាក់ដល់មនុស្ស ដែលត្រូវច្បាប់ នៅក្នុងទីក្រុងរស់នៅនេះហាមឃាត់។
លុះប៉ូលិសទៅដល់ ប៉ូលិសក៏ទុកពេល ឲ្យលោក Dan យក Diggy ចេញពីផ្ទះនោះតាមសម្រួល បើមិនអញ្ចឹងទេ ខាងប៉ូលិសនឹងឃាត់យកសត្វសុនខនោះតែម្ដង។ ប៉ុន្តែ Dan មិនព្រមក៏បានប្ដឹងគ្នា ទៅដល់តុលាការ និងបានពិនិត្យរកពូជសុនខ និងអះអាងថា Diggy ជាប្រភេទសត្វសុនខពូជ Bulldog មិនមែនជាពូជ Pit Bull ដូចអ្វីដែលគេចោទប្រកាន់ឡើយ។
លុះសម្រេចសម្រួលចុងក្រោយ លោក Dan ក៏បានសិទ្ធិយក Diggy ទៅចិញ្ចឹមវិញពីតុលាការ ហើយ ចាប់តាំងពីពេលនោះអាជ្ញាធរទីក្រុងខាងលើ ក៏បានសម្រេចមិនឲ្យប៉ូលិស ធ្វើការកំណត់ពូជសុនខដោយខ្លួនឯង ដូចករណីលោក Dan ឡើយ ដោយឲ្យខាងពេទ្យសត្វពិនិត្យរកពូជ របស់ពួកគេឲ្យច្បាស់លាស់សិន ទើបប៉ូលិសចាប់វិធានការណ៍ តាមក្រោយបាន៕ Source: Sabay
