ដើម្បីបង្ខំឱ្យជប៉ុនចុះចាញ់សង្គ្រាមលោកលើកទី២ អាមេរិក បានប្រើធម៌ក្តៅបំផុតមួយ ដោយបញ្ជូនយន្តហោះទៅទម្លាក់គ្រាប់បែកបរមាណូ លើកដំបូងបង្អស់ ទៅលើប្រទេសមួយនេះ។
យន្តហោះ B-29 ដែលបើកដោយពីឡុតឈ្មោះ Paul W. Tibbets ចេញពីកោះ Tinian ក្នុងមហាសមុទ្រប៉ាស៊ីហ្វិក បានដឹកគ្រាប់បែកបរិមាណូឈ្មោះ «Little Boy» សំដៅទៅទម្លាក់នៅគោលដៅ ក្រុងហ៊ីរ៉ូស៊ីម៉ា នៅម៉ោង ៨:១៥នាទីព្រឹកថ្ងៃទី៦ ខែសីហា ១៩៤៥។ ការទម្លាក់គ្រាប់បែកនេះ បានធ្វើឱ្យមនុស្សប្រមាណ ១៤ម៉ឺននាក់ក្នុងក្រុងត្រូវបាត់បង់ជីវិត។
ជុំវិញការទម្លាក់គ្រាប់បែក មហាប្រល័យលោកនេះ លោក Paul W. Tibbets បានថ្លែងក្នុងកិច្ចសម្ភាសន៍មួយកាលពីឆ្នាំ១៩៨៩ថា នេះជាកិច្ចការប្រកបដោយ មោទនភាពដែលលោក បានបម្រើឱ្យប្រទេសជាតិ ហើយលោកក៏តែងតែដេកលក់ស្រួលរាល់យប់ដែរ ពោលគឺលោកគ្មានការសោកស្តាយអ្វីនោះទេ។
តែទោះយ៉ាងណាក៏ដោយ លោកថា លើកទី១ ដែលលោកបានទម្លាក់គ្រាប់បែក លើគោលដៅទីក្រុងមួយនោះ លោកបាននិយាយ មកកាន់ខ្លួនឯងថា «ប្រជាជនកំពុងតែស្លាប់នៅទីនោះ ទាំងដែលពួកគេមិនមានហេតុផលអី ដែលត្រូវស្លាប់ឡើយ។ ពួកគេមិនមែនជាទាហាននោះទេ»។
បន្ទាប់មកលោកក៏មានគំនិតមួយទៀត យល់ឃើញថា ការទម្លាក់គ្រាប់បែកនោះ មិនមែនជារឿងផ្ទាល់ខ្លួនលោកឡើយ។ «ខ្ញុំត្រូវបានណែនាំឱ្យបំពេញបេសកកម្មយោធា ក្នុងការទម្លាក់គ្រាប់បែក ហើយនោះជាអ្វីដែលខ្ញុំ ត្រូវធ្វើឱ្យអស់ពីលទ្ធភាព»។
ពីឡុតរូបនេះ បាននិយាយថា ក្នុងសង្គ្រាម គ្មានពាក្យឡើយថាសីលធម៌។ «ខ្ញុំមិនខ្វល់ថាតើអ្នកកំពុងទម្លាក់គ្រាប់បែកបរមាណូ ឬគ្រាប់បែកទម្ងន់ ១០០ផោន ឬកំពុងបាញ់កាំភ្លើងទេ ពោលគឺអ្នកត្រូវយករឿងសីលធម៌ចេញពីក្នុងចិត្តអ្នក»។
ការទម្លាក់គ្រាប់បែកលើកទី១ ជប៉ុននៅមិនទាន់យល់ព្រម ចុះចាញ់នៅឡើយទេ។ ៣ថ្ងៃក្រោយមកទៀត គឺនៅថ្ងៃទី៩ ខែសីហា ឆ្នាំ១៩៤៥ លោកបានបើកយន្តហោះ ទៅទម្លាក់គ្រាប់បែកបរមាណូមួយទៀត ឈ្មោះ «Fat Man» នៅក្រុងណាហ្គាសាគី ដែលធ្វើឱ្យមនុស្សប្រមាណ ៨ម៉ឺននាក់បានស្លាប់។ ក្រោយមកមិនបានប៉ុន្មានថ្ងៃផង ជប៉ុន ក៏ប្រកាសចុះចាញ់សង្គ្រាមតែម្តង។
សូមជម្រាបថា លោក Paul W. Tibbets បានកើតក្នុងឆ្នាំ១៩១៥ នៅរដ្ឋ Illionois និងបានស្លាប់ក្នុងឆ្នាំ២០០៧ នៅរដ្ឋ Ohio ក្នុងអាយុ ៩២។ លោកបានចូលបម្រើទ័ពអាកាសអាមេរិក ពីឆ្នាំ ១៩៣៧-១៩៦៦៕ Source: Sabay