បរទេស៖មហាសេដ្ឋី កំពូលអ្នកមានទ្រព្យសម្បត្តិច្រើនបំផុត លោក Elon Musk បន្ទាប់ពីមានព័ត៌មានច្បាស់ការនឹងក្លាយជាថៅកែថ្មី របស់ក្រុមហ៊ុន Twitter ហើយនោះលោកបានបញ្ជាក់ថា នៅក្រោយដំណើរការ ទិញលក់រួចរាល់លោក នឹងអនុញ្ញាតិឲ្យអតីតប្រធានាធិបតី Donald Trump អាចវិលត្រឡប់មកកាន់បណ្តាញសង្គមយក្សនេះវិញ។
រំលឹកដែរថាលោក Trump ត្រូវបាន Twitter លុបគណនេយ្យរបស់លោកចោល បន្ទាប់ពីហេតុការណ៍វាយប្រហារអគាររដ្ឋាភិបាល កាលពីថ្ងៃទី៦ខែមករាកន្លងមក ដោយសារតែការបង្ហោះមិនទទួលស្គាល់ ការបោះឆ្នោតរបស់លោក Trump ។
លោក Musk ដែលបានហៅការសម្រេចចិត្ត លុបចោលគណនេយ្យរបស់លោក Trump នេះថាជាការសម្រេចចិត្ត មិនត្រឹមត្រូវនិងដ៏ល្ងង់ខ្លៅបំផុត ហើយគឺជាកំហុសដែលមិនអាចទទួលយកបានឡើយ ពីព្រោះថាលោក Donald Trump គួរតែមានសិទ្ធក្នុងការបញ្ចេញមតិផ្ទាល់ខ្លួន។
គួរឲ្យដឹងដែរថាចាប់ពីហេតុការណ៍ ថ្ងៃទី៦ខែមករាកន្លងមកលោក Trump ត្រូវបានគេលុបចោលជាបន្តបន្ទាប់ ពីបណ្តាញសង្គមធំៗដូចជា Twitter, Facebook, Youtube ព្រមទាំងបណ្តាញសង្គមជាច្រើនផ្សេងទៀតផង៕ ប្រែសម្រួល៖ស៊ុនលី
