តួកគី បន្តសំណើធ្វើបត្យាប័ន ជាមួយស៊ុយអែត និងហ្វាំងឡង់ បន្ទាប់ពីកិច្ចព្រមព្រៀង សមាជិកភាពណាតូ

អង់ការ៉ា ៖ ប្រទេសតួកគីកាលពីថ្ងៃពុធ បានបន្តសំណើធ្វើបត្យាប័ន របស់ខ្លួនសម្រាប់ “ជនសង្ស័យភេរវករ” ជាមួយហ្វាំងឡង់ និងស៊ុយអែត បន្ទាប់ពីកិច្ចព្រមព្រៀង ដែលខ្លួនបានធ្វើជាមួយប្រទេស Nordic សម្រាប់ការដេញថ្លៃ សមាជិកភាព របស់អង្គការណាតូ។

រដ្ឋមន្ត្រីក្រសួងយុត្តិធម៌ Bekir Bozdag បានឲ្យដឹងនៅក្នុងបទសម្ភាសន៍ តាមទូរទស្សន៍មួយ នៅលើទូរទស្សន៍ Haber Global ថា “ថ្ងៃនេះ យើងបានបន្តសំណើមួយចំនួន ដែលត្រូវបានបដិសេធពីមុន និងបានរំលឹកពួកគេអំពីសំណើមួយចំនួន ដែលមិនត្រូវបានឆ្លើយតប” ។

លោក Bozdag បានលើកឡើងថា ប្រទេសទាំងពីរ កាលពីមុនមិនបានឆ្លើយតបទៅ នឹងសំណើបត្យាប័ន ណាមួយរបស់តួកគី សម្រាប់ “ជនសង្ស័យភេរវករ” ទោះបីជាពួកគេស្របតាមកិច្ច ព្រមព្រៀងអន្តរជាតិ និងទ្វេភាគីក៏ដោយ ។

លោកបានបន្ដថា “នៅក្នុងក្របខ័ណ្ឌ នៃកិច្ចព្រមព្រៀង ដែលបានចុះហត្ថលេខារវាងតួកគី ស៊ុយអែត និងហ្វាំងឡង់ នៅក្នុងកិច្ចប្រជុំកំពូលចុងក្រោយ របស់អង្គការណាតូ គណៈកម្មាធិការត្រួតពិនិត្យ មួយត្រូវបានបង្កើតឡើង” ។

ដំណើរការចូលជាសមាជិកអង្គការណាតូ ដំបូងឡើយត្រូវបានរារាំងដោយតួកគី ដែលបានចោទប្រកាន់ ប្រទេស Nordic ថា “គាំទ្រ” ក្រុមភេរវករប្រឆាំងតួកគី ខណៈដែលពួកគេបានបដិសេធ សំណើធ្វើបត្យាប័ន របស់ប្រទេសតួកគី សម្រាប់ជនសង្ស័យ ដែលមានទំនាក់ទំនងជាមួយគណបក្ស ពលករឃឺដ (PKK) និងចលនា Gulen ៕
ប្រែសម្រួល ឈូក បូរ៉ា