គៀវ ៖ អ៊ុយក្រែន កំពុងទប់ស្កាត់ការដាច់ភ្លើងអស់រយៈពេលជាច្រើនម៉ោង នៅថ្ងៃព្រហស្បតិ៍នេះ បន្ទាប់ពីខ្សែអគ្គិសនី ត្រូវបានបំផ្លាញ ក្នុងអំឡុងពេលការទម្លាក់គ្រាប់បែករបស់រុស្ស៊ី នេះបើយោងតាមការចុះផ្សាយ របស់ទីភ្នាក់ងារសារព័ត៌មាន The National ។
ប្រធានាធិបតីអ៊ុយក្រែនលោក វូឡូឌីមៀ ហ្សេឡិនស្គី បានលើកឡើងថា មនុស្សគួរតែកាត់បន្ថយការប្រើប្រាស់អគ្គិសនីរបស់ពួកគេ ចាប់ពីម៉ោង ៧ ព្រឹកនៅថ្ងៃព្រហស្បតិ៍នេះ។
ក្រុមហ៊ុនថាមពល Ukrenergo បានឲ្យដឹងថា ខ្សែថាមពលបានរងការខូចខាតកាន់តែច្រើនក្នុងរយៈពេល ១០ថ្ងៃកន្លងមក ជាងរយៈពេល ៨ខែមុន ដោយសាររុស្ស៊ី បង្កើនការវាយប្រហារដោយមីស៊ីលរបស់ខ្លួន ។
រុស្ស៊ីបានទទួលស្គាល់ថា បានវាយលុកលើហេដ្ឋារចនាសម្ព័ន្ធថាមពលជាមួយនឹងកាំជ្រួចរយៈចម្ងាយឆ្ងាយ ខណៈអ៊ុយក្រែនបានឲ្យដឹងថាយន្តហោះដ្រូន ដែលផលិតដោយអ៊ីរ៉ង់ក៏ពាក់ព័ន្ធផងដែរ។
ការដាច់ចរន្តអគ្គិសនី ដែលអាចគ្រប់គ្រងបានអាចអូសបន្លាយ ដល់ទៅ ៤ម៉ោងក្នុងពេលតែមួយ បន្ទាប់ពីប្រហែល ៣០ភាគរយនៃហេដ្ឋារចនា សម្ព័ន្ធថាមពលរបស់ប្រទេសអ៊ុយក្រែន ត្រូវបានខូចខាត។
ក្រុមមន្ត្រីបានឲ្យដឹងថា ការកាត់ផ្តាច់ចរន្តអគ្គិសនីបន្ថែមទៀត អាចនឹងត្រូវការក្នុងប៉ុន្មានសប្តាហ៍ខាងមុខនេះ ខណៈដែលរដូវរងាអ៊ុយក្រែន ដ៏ត្រជាក់បានចូលមកដល់។ ប្រជាជនត្រូវបានជំរុញ ឱ្យសាកថ្មទូរស័ព្ទ ពិល និង Power Bank មុនភ្លើងរលត់៕
