វ៉ាស៊ីនតោន៖ ប្រធានាធិបតីអាមេរិកលោក ចូ បៃដិន នឹងធ្វើជាម្ចាស់ផ្ទះ ទទួលសមភាគីប្រេស៊ីលលោក Luiz Inacio Lula da Silva សម្រាប់ដំណើរទស្សនកិច្ច នៅសហរដ្ឋអាមេរិក នៅដើមខែកុម្ភៈ នេះបើយោងតាមសេចក្តីថ្លែងការណ៍រួម ដែលបានចេញផ្សាយកាលពីថ្ងៃចន្ទ បន្ទាប់ពីការហៅទូរស័ព្ទ រវាងប្រធានាធិបតីទាំងពីរ បន្ទាប់ពីការវាយប្រហារដោយហិង្សា លើអគាររដ្ឋាភិបាលប្រេស៊ីល។
សេចក្តីថ្លែងការណ៍រួមបានឲ្យដឹងថា ដំណើរទស្សនកិច្ច ដែលការអញ្ជើញពីលោក បៃដិន ត្រូវបានទទួលយកដោយលោក Lula da Silva មានបំណងបម្រើជាឱកាសមួយ សម្រាប់មេដឹកនាំទាំងពីរមាន “ការពិគ្រោះយោបល់ស៊ីជម្រៅ លើរបៀបវារៈចែករំលែកដ៏ធំទូលាយមួយ” ។
ក្នុងអំឡុងការអំពាវនាវនេះ លោក បៃដិន បាន “ថ្កោលទោសអំពើហឹង្សា និងការវាយប្រហារលើស្ថាប័ន ប្រជាធិបតេយ្យ និងការផ្ទេរអំណាចដោយសន្តិវិធី” ដែលពិភពលោកបានឃើញ នៅទីក្រុង Brasilia រដ្ឋធានីរបស់ប្រទេសនេះ ខណៈដែលក្រុមអ្នកគាំទ្រ អតីតប្រធានាធិបតីលោក Jair Bolsonaro បានសម្រុកចូលវិមានប្រធានាធិបតី អគារសភា និងតុលាការកំពូលនៅថ្ងៃអាទិត្យ។
គិតត្រឹមថ្ងៃច័ន្ទនេះម្សិលមិញនេះ ការចាប់ខ្លួនជាង ១២០០នាក់ ត្រូវបានធ្វើឡើង ពាក់ព័ន្ធនឹងអំពើហិង្សានេះ នេះបើយោងតាមការធ្វើបច្ចុប្បន្នភាព ដោយរដ្ឋមន្ត្រីយុត្តិធម៌ប្រេស៊ីល លោក Flavio Dino ។
អ្នកគាំទ្រលោក Bolsonaro កំពុងតវ៉ាប្រឆាំងនឹងការបរាជ័យ របស់អតីតប្រធានាធិបតីដោយលោក Lula da Silva ក្នុងការបោះឆ្នោតប្រធានាធិបតីខែតុលា។ លោកBolsonaro មិនបានចូលរួមពិធីសម្ពោធ អ្នកស្នងតំណែងរបស់គាត់នៅថ្ងៃទី០១ ខែមករា ហើយឥឡូវនេះស្ថិតនៅក្នុងរដ្ឋ Florida សហរដ្ឋអាមេរិក ដែលត្រូវបានគេរាយការណ៍ថា កំពុងសម្រាកព្យាបាលនៅមន្ទីរពេទ្យ ដោយសារតែ “ភាពមិនស្រួល” ។
នៅក្នុងសន្និសីទសារព័ត៌មានប្រចាំថ្ងៃមួយ កាលពីថ្ងៃចន្ទ អ្នកនាំពាក្យក្រសួងការបរទេសសហរដ្ឋអាមេរិក លោក Ned Price បានបដិសេធមិនបង្ហាញពីប្រភេទ នៃទិដ្ឋាការដែលលោក Bolsonaro ចូលសហរដ្ឋអាមេរិក៕ប្រែសម្រួល ឈូក បូរ៉ា
