ប៉េកាំង៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៧ ខែកុម្ភៈ ឆ្នាំ២០២៣ថា ប្រទេសចិន កាលពីថ្ងៃព្រហស្បតិ៍ បានដាក់ទណ្ឌកម្មលើក្រុមហ៊ុន Lockheed Martin និងអង្គភាពនៃក្រុមហ៊ុន Raytheon Technologies ទៅក្នុង “បញ្ជីអង្គភាពដែលមិនគួរឱ្យទុកចិត្ត” ជុំវិញការលក់អាវុធទៅឱ្យកោះតៃវ៉ាន់ ដោយហាមឃាត់ពួកគេពីការនាំចូល និងការនាំចេញពាក់ព័ន្ធនឹងប្រទេសចិន នៅក្នុងការដាក់ទណ្ឌកម្ម ចុងក្រោយរបស់ខ្លួន ប្រឆាំងនឹងក្រុមហ៊ុនអាមេរិក ។
វិធានការនេះកើតឡើង ចំពេលមានភាពតានតឹង កាន់តែខ្លាំងឡើង បន្ទាប់ពីយោធាអាមេរិក បានបាញ់ទម្លាក់នូវអ្វីដែលខ្លួន និយាយថា ជាប៉េងប៉ោងចារកម្មរបស់ប្រទេសចិន ហើយមួយថ្ងៃបន្ទាប់ពី ក្រុងប៉េកាំងបានព្រមានពី “វិធានការណ៍ប្រឆាំងនឹងអង្គភាពពាក់ព័ន្ធ របស់សហរដ្ឋអាមេរិក ដែលបំផ្លាញអធិបតេយ្យភាព និងសន្តិសុខរបស់ប្រទេសចិន” ។
ក្រសួងពាណិជ្ជកម្មរបស់ចិន បានឲ្យដឹងនៅក្នុង សេចក្តីថ្លែងការណ៍មួយថា ក្រុមហ៊ុន Lockheed Martin Corp និង Raytheon Missile និង Defense Corp ដែលជាក្រុមហ៊ុនបុត្រសម្ព័ន្ធរបស់ Raytheon Technologies Corp ត្រូវបានហាមឃាត់មិនឱ្យ “ចូលរួមក្នុងសកម្មភាពនាំចូល និងនាំចេញដែលទាក់ទងនឹងប្រទេសចិន” ។
អ្នកនាំពាក្យសេតវិមាន Karine Jean-Pierre បានប្រាប់ដល់អ្នកយក ព័ត៌មានកាលពីថ្ងៃព្រហស្បតិ៍ថា “ទាំងនេះគឺជាវិធានការនិមិត្តសញ្ញា និងមិនចាំបាច់ នោះហើយជារបៀប ដែលយើងមើលពួកគេ” ៕
ប្រែសម្រួលដោយ៖ ម៉ៅ បុប្ផាមករា
