រ៉ូម៖ សីតុណ្ហភាពបានឈាន ដល់កម្រិតខ្ពស់គ្រប់ពេលវេលា នៅក្នុងប្រទេសអ៊ីតាលី និងអេស្បាញកាលពីថ្ងៃអាទិត្យ ជាមួយនឹងសីតុណ្ហភាពកាន់តែខ្ពស់ ដែលត្រូវបានព្យាករណ៍ ក្នុងរយៈពេលប៉ុន្មានថ្ងៃខាងមុខនេះ។
រលកកំដៅចុងក្រោយបង្អស់ ដែលជាលើកទី៣ នៅអឺរ៉ុបក្នុងរដូវក្តៅនេះ បានកើតឡើងនៅពេល ដែលទ្វីបនេះកំពុងទទួលភ្ញៀវទេសចរណ៍ចំនួនកំណត់ត្រា ដែលជាកំណត់ត្រាដំបូងនៃរដូវក្តៅ នៃទេសចរណ៍ចាប់តាំងពីឆ្នាំ២០១៩។
សីតុណ្ហភាពលើសពី ៤៨ អង្សាសេត្រូវបានកត់ត្រាទុក ជាបណ្តោះអាសន្ន កាលពីថ្ងៃអាទិត្យនៅលើកោះសាឌីនៀ របស់អ៊ីតាលី ក្នុងតំបន់ អាពូលា ភាគខាងត្បូងនៃប្រទេសអ៊ីតាលី និងនៅ ឡាប៉ាល់ម៉ា ក្នុងប្រទេសអេស្ប៉ាញ។
កំណត់ត្រាគ្រប់ពេលសម្រាប់សីតុណ្ហភាពនៅអឺរ៉ុបគឺ ៤៨,៨ អង្សាសេ ដែលកំណត់នៅឆ្នាំ២០២១ នៅស៊ីស៊ីលី។ មន្ត្រីម្នាក់មកពីទីភ្នាក់ងារអវកាសអឺរ៉ុប (ESA) បានប្រាប់កាសែតស៊ីនហួថា សីតុណ្ហភាពខ្ពស់នៅទូទាំងទ្វីបអឺរ៉ុប អាចខិតជិត ឬលើសពីកម្រិតនោះគ្រប់ពេលក្នុងប៉ុន្មានថ្ងៃថ្មីៗនេះ។
នៅក្នុងប្រទេសអ៊ីតាលី ទីក្រុងចំនួន ១៦ រួមទាំងទីក្រុងរ៉ូម និង ផ្ល័រិន ស្ថិតនៅក្រោមការប្រកាសអាសន្នពណ៌ក្រហម ដែលមានន័យថា សីតុណ្ហភាពក្នុងអំឡុងពេលក្តៅបំផុតនៃថ្ងៃអាចគំរាមកំហែងដល់សុខភាពរបស់បុគ្គលវ័យក្មេង និងមានសុខភាពល្អ ប្រសិនបើមិនមានការប្រុងប្រយ័ត្ន។
គេហទំព័រអាកាសធាតុ Il Meteo បានឲ្យដឹងថា សីតុណ្ហភាពអាចគំរាមកំហែងដល់កំណត់ត្រាគ្រប់ពេលវេលារហូតដល់យ៉ាងហោចណាស់ថ្ងៃព្រហស្បតិ៍ នៅពេលដែលកំដៅនៅក្នុងតំបន់ជាច្រើននៃប្រទេសទំនងជាត្រូវបានកាត់បន្ថយដោយភ្លៀង។
សីតុណ្ហភាពនៅទីក្រុងរ៉ូមត្រូវបានព្យាករណ៍ថានឹងឡើងដល់ ៤៣ អង្សាសេនៅថ្ងៃច័ន្ទ និងថ្ងៃអង្គារ ដែលជាកំណត់ត្រាមួយ សម្រាប់រដ្ឋធានីអ៊ីតាលី។ នៅប្រទេសអេស្បាញ សីតុណ្ហភាពកាន់តែអាក្រក់ទៅៗ ដោយសារភ្លើងឆេះព្រៃ ដែលបានរុញច្រានមនុស្ស ៤០០០នាក់ចេញពីផ្ទះរបស់ពួកគេនៅ ឡាប៉ាល់ម៉ា នៅលើកោះ កាណារី។
ESA បានឲ្យដឹងនៅដើមសប្តាហ៍នេះថា សីតុណ្ហភាព អាចឈានដល់កំណត់ត្រាជាតិនៅទូទាំងទ្វីបអឺរ៉ុប ក្នុងរយៈពេលប៉ុន្មានថ្ងៃខាងមុខនេះ រួមទាំងនៅក្នុងប្រទេសអ៊ីតាលី អេស្ប៉ាញ ក្រិក បារាំង អាល្លឺម៉ង់ ព័រទុយហ្គាល់ និងប៉ូឡូញ។
បន្ថែមពីលើផល ប៉ះពាល់ នៃការប្រែប្រួលអាកាសធាតុ សីតុណ្ហភាព កំពុងត្រូវបានជំរុញ ឱ្យកាន់តែខ្ពស់ដោយចរន្តអាកាស ធាតុអាហ្រ្វិករំកិល ទៅភាគខាងជើង ឆ្លងកាត់សមុទ្រ មេឌីទែរ៉ាណេ កត្តាដែលបានធ្វើមូលដ្ឋានីយកម្មដូចជាភ្លើងឆេះព្រៃនៅក្នុងប្រទេសអេស្ប៉ាញ និងព្រឹត្តិការណ៍ពិភពលោក ដូចជាបាតុភូតអាកាសធាតុ El Nino នៅមហាសមុទ្រប៉ាស៊ីហ្វិក៕
ប្រែសម្រួល ឈូក បូរ៉ា
