រ៉ូម ៖ ប្រធានក្រុមហ៊ុន Tesla លោក Elon Musk បាននិយាយថា ការប្រកួតក្នុងទ្រុង ដែលបានគ្រោងទុករបស់លោក ជាមួយគូប្រជែងមហាសេដ្ឋីលោក Mark Zuckerberg នឹងត្រូវធ្វើឡើងនៅ “ទីតាំងវីរភាព” ជាមួយនឹងប្រធានបទរ៉ូម៉ាំង បុរាណ ខណៈប្រទេស អ៊ីតាលីបាន ចង្អុលបង្ហាញថា ខ្លួនបានត្រៀមខ្លួន រួចជាស្រេច ដើម្បីរៀបចំការប្រកួតជាផ្លូវការហើយ យោងតាមការចេញផ្សាយ ពីគេហទំព័រជប៉ុនធូដេ ។
រដ្ឋមន្ត្រីក្រសួងវប្បធម៌ របស់ប្រទេសអ៊ីតាលី លោក Gennaro Sangiuliano បាននិយាយក្នុងសេចក្តីថ្លែងការណ៍មួយថា លោកបាននិយាយជាមួយលោក Musk អំពីការធ្វើជាម្ចាស់ផ្ទះព្រឹត្តិការណ៍ សប្បុរសធម៌ និង ជាប្រវត្តិសាស្ត្រដ៏ធំ របស់ប្រទេសនេះ ។ លោកមិនបានបញ្ជាក់ថា តើព្រឹត្តិការណ៍នេះ នឹងធ្វើឡើងនៅពេលណា ឬអាចនឹងប្រារព្ធឡើង នៅពេលណានោះទេ ដោយគ្រាន់តែនិយាយថា វានឹងមិនប្រព្រឹត្តទៅក្នុងទីក្រុងរ៉ូម ។
អ្នកនយោបាយបក្សប្រឆាំង បានបរិហារពីឆន្ទៈរបស់លោកធ្វើឲ្យប្រព័ន្ធ ផ្សព្វផ្សាយសង្គម និងមហាសេដ្ឋីបច្ចេកវិទ្យាប្រកួតប្រជែងគ្នា នៅប្រទេសអ៊ីតាលី។ លោក Carlo Calenda អតីតរដ្ឋមន្ត្រីក្រសួងឧស្សាហកម្ម និងជាប្រធានគណបក្ស Azione បាននិយាយថា ខ្ញុំយល់ថា វាជារឿង គួរឲ្យភ្ញាក់ផ្អើលមួយ ដែលបេតិកភណ្ឌវប្បធម៌អ៊ីតាលី កំពុងត្រូវបានផ្តល់ ជូនសម្រាប់មហាសេដ្ឋី ២ នាក់ដែលចង់បណ្ដោយ ខ្លួនដូចជាក្មេងជំទង់ល្ងង់ ។
លោកបាន បន្តថា មានរបស់ដែលសាមញ្ញ មិនមែនសម្រាប់លក់ទេ ហើយមួយក្នុងចំណោមរឿង ទាំងនេះគឺសេចក្តីថ្លៃថ្នូរ និងប្រវត្តិសាស្ត្រ របស់ជាតិ ដ៏អស្ចារ្យមួយ។ លោក Musk និងលោក Zuckerberg បាននិយាយដាក់គ្នាទៅវិញទៅមកសម្រាប់ការប្រកួតក្បាច់គុនចម្រុះ (MMA) តាំងពីខែមិថុនា។
លោក Musk បាននិយាយថា Colosseum បុរាណរបស់ទីក្រុងរ៉ូមនឹងធ្វើជាម្ចាស់ផ្ទះការប្រកួត ប៉ុន្តែអ៊ីតាលីបានច្រានចោលរឿងនោះ។ ទោះជាយ៉ាងណាក៏ដោយ ម្ចាស់វេទិកា ប្រព័ន្ធផ្សព្វផ្សាយ X ដែលពីមុនត្រូវបានគេស្គាល់ថាជា Twitter បាននិយាយកាលពីថ្ងៃសុក្រថា ការប្រកួតគ្នានេះនឹងមានប្រធាន បទរ៉ូម៉ាំងបុរាណ ។
នាយកប្រតិបត្តិ ក្រុមហ៊ុន Tesla បាននិយាយលើសារការបង្ហោះនៅលើ X ថា អ្វីគ្រប់យ៉ាងស្ថិតក្នុងស៊ុមកាមេរ៉ានឹងជាទីក្រុងរ៉ូមបុរាណ ដូច្នេះគ្មានអ្វីទំនើប ទាល់តែសោះ ។ ខ្ញុំបាននិយាយទៅកាន់នាយករដ្ឋមន្ត្រីនៃ ប្រទេសអ៊ីតាលី និង រដ្ឋមន្ត្រីក្រសួងវប្បធម៌ ។
លោកបាននិយាយ ក្នុងសេចក្តីថ្លែងការណ៍មួយថា វានឹងមិនកើតឡើង នៅទីក្រុងរ៉ូមទេ។ លើសពីនេះ ចំនួនទឹកប្រាក់ដ៏ច្រើនសន្ធឹកសន្ធាប់ ជាច្រើនលានអឺរ៉ូ ត្រូវបានគេរំពឹងថា នឹងត្រូវបានបរិច្ចាគ ដល់មន្ទីរពេទ្យកុមារអ៊ីតាលីដ៏សំខាន់ចំនួន ២ សម្រាប់ការពង្រឹង សម្ភារៈបរិក្ខារ និងការស្រាវជ្រាវវិទ្យាសាស្ត្រ ដើម្បីប្រយុទ្ធប្រឆាំង នឹងជំងឺកុមារ ៕
ដោយ៖លី ភីលីព
