លោក Nicky Butt អតីតខ្សែបម្រើមួយរូបរបស់ក្លឹប Manchester United កំឡុងឆ្នាំ១៩៩២ រហូតដល់ឆ្នាំ២០០៤ បានរៀបរាប់នៅក្នុងសៀវភៅ Viva Ronaldo!: The Second Coming of Cristiano ថាកាលលោកនៅលេង ជាមួយខ្សែប្រយុទ្ធ Cristiano Ronaldo កីឡាកររូបនេះគិតតែពីហ្វឹកហាត់រហូតសល់តែម្នាក់ឯងនៅលើទីលាន ដល់ថ្នាក់លោក Sir Alex Ferguson ឃាត់ឲ្យឈប់ ទើបគេព្រមឈប់។
លោក Butt បានលើកឡើងថា Ronaldo ទេពកោសល្យរបស់គេមួយមុខ គឺមិនអាចធ្វើឲ្យគេឈាន ដល់ចំណុចកំពូលជាប់អញ្ចឹងទេ ។ គេជាកីឡាករដែលខិតខំ ដាក់ចិត្តដាក់កាយទាំងស្រុង ដើម្បីហ្វឹកហាត់តែម្ដង។ ដូចកាលគេមកដំបូងអញ្ចឹង កាយសម្បទាគេគឺថា ស្បែកគ្របឆ្អឹងដូចទាំងយើង ទាំងអស់គ្នា ហើយដោយសារតែនៅ Premier League នេះគឺត្រូវការកីឡាករមានកាយសម្បទាខ្ពស់ Ronaldo គេខិតរាប់ឆ្នាំ ដើម្បីទទួលបានរាងកាយ ដូចឃើញឥឡូវនេះ ។
បើយោងតាមការចុះលើកឡើង របស់លោកក្នុងសៀវភៅដដែលនេះ បានឲ្យដឹងថា Ronaldo គេជាមនុស្សខិតខំណាស់ ហ្វឹកហាត់មិនចេះឈប់ ដូចកាលមុនគេអត់ទាន់មានសង្សារ ប្រពន្ធកូនអញ្ចឹង គេគិតតែពីហាត់ អ្នកខ្លះតែចុងម៉ោង អីគេប្រញាប់ទៅផ្ទះអីអស់ហើយ តែគេនៅតែហ្វឹកហាត់ រហូតដល់នៅតែម្នាក់ឯងនៅលើទីលាន និងចេញក្រោយគេរហូត ។ ពេលដល់ម៉ោងហូបអាហារមុនទៅផ្ទះអី Ronaldo នៅហាត់ទៀត ដល់ថ្នាក់លោក Sir Alex Ferguson ទៅឃាត់ឲ្យឈប់ ទើបព្រមឈប់ ។
សូមរំលឹកផងដែរថា Ronaldo មកលេងនៅ Man Utd ដំបូងនៅកំឡុងឆ្នាំ២០០៣ ដល់ឆ្នាំ២០០៩ ដោយចូលរួមលេង បាន២៩២ប្រកួត និងរកគ្រាប់បាល់បាន១១៨គ្រាប់ ។ នៅក្នុងរដូវកាលឆ្នាំ២០២១/២២ កីឡាករនេះត្រលប់មកសារជាថ្មី ដោយមកទល់នឹងពេលនេះ ចូលលេងបាន ៥ប្រកួត និងរកបាន៥គ្រាប់ ៕
