ទិន្នន័យផ្ទាល់ខ្លួន របស់អ្នកប្រើប្រាស់ ហ្វេសប៊ុកច្រើនជាង ៥៣៣ លាននាក់ ឯណោះ ត្រូវបានផ្សព្វផ្សាយ តាមប្រព័ន្ធអ៊ីនធឺណេត ក្នុងវេទិកាវាយប្រហារកម្រិតទាប ដោយដាក់ឱ្យទាញ យកជាសាធារណៈ។ ទិន្នន័យទាំងនេះរួមមាន លេខទូរសព្ទ ឈ្មោះអ្នកប្រើប្រាស់ អាសយដ្ឋានអ្នកប្រើ គណនីអ៊ីមែល និងព័ត៌មានផ្សេងទៀតពីគណនីហ្វេសប៊ុក។
ក្នុងចំណោមទិន្នន័យលេចធ្លាយទាំង ៥៣៣ លាននាក់ បានប៉ពាល់ទៅដល់អ្នកប្រើប្រាស់ ប្រមាណ ១០៦ ប្រទេស រួមទាំងកំណត់ត្រាអ្នកប្រើប្រាស់ នៅសហរដ្ឋអាមេរិចជាង ៣២ លាននាក់ នៅចក្រភពអង់គ្លេសជាង ១១លាននាក់និង ៦លាននាក់នៅប្រទេសឥណ្ឌា។
អ្នកស្រាវជ្រាវសន្តិសុខ ព្រមានថាទិន្នន័យទាំងនោះ អាចត្រូវបានប្រើដោយពួក Hacker ដើម្បីក្លែងបន្លំអត្តសញ្ញាណជាមនុស្សពិត និងប្រព្រឹត្តជាទង្វើក្លែងបន្លំណាមួយ ដើម្បីកេងប្រវ័ញ្ច ពីអ្នកប្រើប្រាស់លើអ៊ីនធឺណិត។
បន្ថែមលើនេះទៀត អ្នកនាំពាក្យ ហ្វេសប៊ុកម្នាក់ បានប្រាប់ទៅកាន់ Business Insider ជុំវិញបញ្ហានេះថា ទិន្នន័យលេចធ្លាយ ទាំងនេះកើតឡើងព្រោះតែភាព ងាយរងគ្រោះដែលបានបន្សល់ ដោយក្រុមហ៊ុន Facebook ដោយបានកំណែអាប់ឌែត ប្រព័ន្ធរបស់ខ្លួន កាលពីឆ្នាំ ២០១៩ ៕
