នៅក្នុងឆ្នាំ២០២១កន្លងទៅ ក្រុមហ៊ុនជាច្រើនបានបញ្ចេញ រថយន្តអគ្គិសនីរបស់ពួកគេ ដែលនឹងលេចមុខលើទីផ្សារក្នុងឆ្នាំ២០២២នេះ។ ក្នុងចំណោមនោះ មានរថយន្តអគ្គិសនី៧ ដែលគេកំពុងទន្ទឹងរង់ចាំមើល រួមមានដូចខាងក្រោម៖
- Ford F-150 Lighting
រថយន្តស៊េរី F-150 គឺជាប្រភេទភីកអាប់ ដែលលក់ដាច់ជាងគេបំផុត។ កាន់តែគួរឱ្យភ្ញាក់ផ្អើល នៅពេល Ford ប្រកាសចេញស៊េរីមួយទៀត ដែលជាប្រភេទអគ្គិសនីគឺ Ford F-150 Lighting ដោយគ្រាន់តែបើកឱ្យកក់ភ្លាម គឺត្រូវបានកក់ស្ទើរតែគ្រប់ចំនួនទៅហើយ។ រថយន្តនេះ មានតម្លៃជិត ៤ម៉ឺនដុល្លារ មកជាមួយជម្រើសអាគុយពីរ គឺ standard range និង extended range។ សម្រាប់អាគុយ standard range មានទំហំ ៩៨គីឡូវ៉ាត់ម៉ោង ពេលសាកពេញម្តងបើកបានចម្ងាយ ៣៧០គីឡូម៉ែត្រ។ ចំណែកអាគុយ extended range មានទំហំ ១៣១គីឡូវ៉ាត់ម៉ោង ពេលសាកពេញធ្វើដំណើរបានចម្ងាយ ៤៨០គីឡូម៉ែត្រ។
- Toyota bZ4X
ជារថយន្តអគ្គិសនីដំបូងរបស់ Toyota ចាប់ពីជាង ៥ម៉ឺនដុល្លារឡើងទៅ។ រថយន្តនេះ មានជម្រើសប៉ុង១ រត់កង់មុខ និងប៉ុង២។ ក្នុងនោះប៉ុង១ មានកម្លាំង ២០៤សេះ និងបំពាក់អាគុយផ្ទុកភ្លើងបាន ៧១,៤គីឡូវ៉ាត់ម៉ោង ដែលសាកពេញម្តង អាចធ្វើដំណើរបានដល់ចម្ងាយប្រហែល ៤២០គីឡូម៉ែត្រ។ ចំណែកប៉ុង២ គឺមានកម្លាំងសរុប ២១៨សេះ ជាន់ពីល្បឿន ០ ទៅ ១០០គីឡូម៉ែត្រ/ម៉ោង ប្រើពេល ៧,៧វិនាទី និងមានអាគុយធំជាងបន្តិច គឺអាចផ្ទុកភ្លើងបាន ៧២,៨គីឡូវ៉ាត់ម៉ោង។
- Lexus RZ 450e
ជារថយន្តអគ្គិសនីដំបូងដែល Lexus បានប្រកាសចេញ។ រថយន្តនេះអាចមានកម្លាំងម៉ាស៊ីនខ្លាំង ៥៣៦សេះ ដោយជាន់ពីល្បឿន ០ ទៅ ១០០គ.ម/ម៉ ប្រើពេលតែ ៣វិនាទី និងមានអាគុយធំផ្ទុកភ្លើងបាន ៩០គីឡូវ៉ាត់ម៉ោង ហើយពេលសាកភ្លើងពេញម្តង អាចធ្វើដំណើរ បានដល់ចម្ងាយ ៦០០គីឡូម៉ែត្រ។
- Subaru Solterra 2023
ជារថយន្តអគ្គិសនីដំបូងរបស់ Subaru ផលិតឡើង ដោយសហការជាមួយនឹង Toyota។ វាប្រើម៉ូទ័រអគ្គិសនីមួយ ប៉ុង១ រត់កង់ខាងមុខ កម្លាំង ២០១សេះ និងជម្រើសប៉ុង២ កម្លាំង ២១៥សេះ។ អាគុយរបស់រថយន្តនេះ អាចផ្ទុកភ្លើងបាន ៧១,៤គីឡូវ៉ាត់ម៉ោង ហើយពេលសាកពេញម្តង អាចរត់បានចម្ងាយ ៤៦០គីឡូម៉ែត្រ សម្រាប់ប៉ុង២ និង ៥៣០គីឡូម៉ែត្រ សម្រាប់ប៉ុង១
- Tesla Cybertruck
ជារថយន្តដ៏ល្បីខ្លាំងជាងគេបំផុត ក្នុងពិភពលោក ដោយសារតែរូបរាងជ្រុងបែបអនាគតរបស់វា។ តាមការលេចធ្លាយកន្លងមកឱ្យដឹងថា រថយន្តនេះ មានតម្លៃ ៣៩ ៩០០ដុល្លារ (សម្រាប់ Single-motor ប៉ុង១រត់កង់ខាងក្រោយ)។ តម្លៃ Cybertruck នឹងខ្ពស់ជាងនេះ ពោលគឺប្រមាណ ៤៩ ៩០០ដុល្លារ សម្រាប់ប្រភេទ Dual-motor ប៉ុង២ ឬឡើងដល់ ៦៩ ៩០០ សម្រាប់ប្រភេទ tri-motor ប៉ុង២។ សម្រាប់ប្រភេទ Single Motor រថយន្ត Cybertruck នេះ អាចជាន់ពីល្បឿន ០ ទៅ ១០០គីឡូម៉ែត្រ/ម៉ោង ប្រើពេល ៦,៥វិនាទី ហើយពេលសាកភ្លើងពេញម្តង អាចបើកដល់ចម្ងាយ ៤០០គីឡូម៉ែត្រ។ ចំណែកប្រភេទ Dual Motor អាចបើកលើសនេះ ៨០គីឡូម៉ែត្រទៀត (ល្បឿនពី០ ទៅ ១០០គ.ម/ម៉ ប្រើពេលក្រោម ៤,៥វិនាទី) និងប្រភេទ Tri-motr បន្ថែមដល់ ៩៦គីឡូម៉ែត្រ (ល្បឿនពី០ ទៅ ១០០គ.ម/ម៉ ប្រើពេលក្រោម ៣,៥វិនាទី)។
- Hyundai Ioniq 5 ឆ្នាំ២០២២
រថយន្តនេះ មានតម្លៃចាប់ពី ៣៩ ៧០០ដុល្លារឡើងទៅ។ វាបំពាក់ម៉ូទ័រអគ្គិសនីមួយ នៅប៉ុងខាងក្រោយ និងអាគុយទំហំ ៧៧,៤គីឡូវ៉ាត់ម៉ោង ដែលបង្កើតកម្លាំងបានសរុប ២២៥សេះ និងកម្លាំងរមួល ៣៤៩ញ៉ូតុនម៉ែត្រ។ Hyundai ក៏ផ្តល់ជម្រើស Ioniq 5 ប្រើម៉ូទ័រអគ្គិសនី២ លើប៉ុងទាំងពីរ ដែលអាចបង្កើតកម្លាំងបាន ៣២០សេះ និងកម្លាំងរមួល ៦០៤ញ៉ូតុនម៉ែត្រ។ ម៉ូដែលនេះអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលមិនដល់ ៥វិនាទីឡើយ ប៉ុន្តែមានចម្ងាយបើកបរ ត្រឹមតែ ២៥៦ម៉ាយ៍ ឬ ៤១២គីឡូម៉ែត្រប៉ុណ្ណោះ នៅពេលសាកភ្លើងពេញម្តង។ វាក៏មានប្រភេទ Standard Range មួយទៀត ដែលប្រើម៉ូទ័រអគ្គិសនីមួយ និងមានចម្ងាយបើកបរ ២២០ម៉ាយ៍ ឬ ៣៥៤គីឡូម៉ែត្រ។ នៅពេលអាគុយនៅសល់ ១០% ការសាកភ្លើងតាមរយៈដុំសាក ២៤០វ៉ុល Level 2 អាចបំពេញវាក្នុងរយៈពេល ៦ម៉ោង និង ៤៣នាទី។ លើសពីនេះទៅទៀត វាក៏គាំទ្របច្ចេកវិទ្យាសាកភ្លើងល្បឿនលឿនដែរ ដោយដុំសាកកម្លាំង ៣៥០គីឡូវ៉ាត់ អាចបំពេញអាគុយពី ១០-៨០% ប្រើពេល ១៨នាទី ឬ សាកត្រឹម ៥នាទី អាចបានចម្ងាយបើកបរ ៦៨ម៉ាយ៍ ឬ ១០៩គីឡូម៉ែត្រឯណោះ។
- Kia EV6 ឆ្នាំ២០២២
វាចេញមកមានគោលដៅសំខាន់ គឺប្រជែងជាមួយនឹង Hyundai Ioniq 5។ រថយន្តនេះ ពេលសាកភ្លើងពេញ គឺអាចធ្វើដំណើរបានចម្ងាយពី ៣៧៣ ទៅដល់ ៤៩៨គីឡូម៉ែត្រ ដោយខុសគ្នាទៅតាម option រថយន្តដែលមានដូចជា EX, EX Plus, GT-Line និង GT។ តួយ៉ាងរថយន្ត EV6 EX ដែលបំពាក់អាគុយទំហំ ៥៨គីឡូវ៉ាត់ម៉ោង គឺអាចបើកបរបានត្រឹម ៣៧៣គីឡូម៉ែត្រ ចំណែកឯ EV6 GT-Line និង EX Plus ផ្ទុកអាគុយទំហំ ៧៧,៤គីឡូវ៉ាត់ម៉ោង គឺអាចធ្វើដំណើរ បានចម្ងាយ ៤៩៨គីឡូម៉ែត្រ។ បើប្រៀបធៀប Hyundai Ioniq 5 ពេលសាកភ្លើងពេញធ្វើដំណើរ បានចម្ងាយ ៤៨៧គីឡូម៉ែត្រ៕ Source: Sabay
