បច្ចេកវិទ្យា

Honda ត្រៀម​ចេញ​ឡាន​វ៉ែន​ ​កៅអី​អាចបត់​ ធ្វើជាគ្រែដេក​បាន

ក្រុមហ៊ុន Honda គ្រោង​នឹង​បញ្ចេញ​រថយន្ត​វ៉ែន​របស់ខ្លួន​ម៉ូដែល Step WGN 2022 ក្នុងពិព័រណ៌យានយន្ត Tokyo Auto Salon 2022 នៅ​ថ្ងៃទី១៥មករាខាងមុខ។

រថយន្ត​នេះ​ត្រូវបាន​អភិវឌ្ឍន៍​ដល់​ជំនាន់ទី៦ ដោយ​រក្សា​ការឌីហ្សាញ​បែប​ប្រអប់ដដែល​ ដើម្បី​ឱ្យផ្នែកខាងក្នុងធំទូលាយ ប៉ុន្តែរូបរាងខាងក្រៅ ស្អាត​ជាងជំនាន់ទី៥ ដោយ​បំពាក់​ជាមួយ​ចង្កៀង LED រាងចតុកោណកែង ភ្ជាប់​គ្នាជាមួយ​ប៉ាណា​ដ៏ធំមួយ។

រថយន្ត​ Honda Step WGN 2022 មាន​ជម្រើសប្រើ​ម៉ាស៊ីន​សាំងសុទ្ធ និងម៉ាស៊ីន Hybrid។ វាមាន​ option ចំនួន៣ គឺ​ Air, Spada និង Spada Premium Line។ សម្រាប់​ option Spada និង Spada Premium មាន​ក្រូមេច្រើន ប៉ាណាធំជាង option Air និងមាន​ Spoiler នៅខាងក្រោយ។

ផ្ទៃខាងក្នុង​របស់​រថយន្ត​នេះ គឺមានភាព​ទូលាយ បង្អួច​ក៏ធំ​ផ្តល់នូវពន្លឺ​ចេញ​ចូល​ភ្លឺច្បាស់​ដល់​កាប៊ីន ឯទ្វារសងខាង​ជាប្រភេទទ្វារស្លាយ​ដោយ​គ្រាន់​តែចុចប៊ូតុង​វាបិទបើកអូតូ។ វា​បំពាក់​អេក្រង់ ១១,៤អ៊ីញ ប្រើប្រាស់​ជាមួយ​កម្មវិធី Honda CONNECT Navi ហើយនៅខាងក្រោយក៏មាន​អក្រង់​ទំហំ ១៥,៦អ៊ីញ បង្ហាញ​រូបភាពកម្រិត HD ទៀតផង។

កៅអីជួរទីពីររបស់ Honda Step WGN 2022 អាចរុញខ្ទប់ទៅកៀន ឬទៅមុខទៅក្រោយបាន។ មិនតែប៉ុណ្ណោះ កៅអីជួរទី២ និងទី៣ អាច​រៀបចំ​ទៅជាគ្រែគេងបានទៀតផង។

ទោះជាយ៉ាងណាក៏ដោយ ក្រុមហ៊ុន Honda មិនទាន់បាន​ទម្លាយ​លម្អិតអំពីលក្ខណៈបច្ចេកទេស និងតម្លៃ​នៃរថយន្តនេះឡើយ ដោយរង់ចាំបង្ហាញ​ជាផ្លូវការ​ក្នុងពិព័រណ៌ខាងលើតែម្តង៕ Source: Sabay

Most Popular

To Top