តៃប៉ិតៃវ៉ាន់៖ក្រុមហ៊ុន Taiwan Semiconductor Manufacturing Co ជាក្រុមហ៊ុនផលិតបន្ទះសៀគ្វីដំណើរការធំបំផុតបានរាយការណ៍ថា ប្រាក់ចំណេញប្រចាំត្រីមាសរបស់ខ្លួនបានកើនឡើង ១៦.៤ភាគរយធៀបនឹងឆ្នាំមុនដល់ ៦ ពាន់លានដុល្លារ ចំពេលមានការកើនឡើងនៃតម្រូវការបន្ទះឈីបសម្រាប់ស្មាតហ្វូន និងគ្រឿងអេឡិចត្រូនិកផ្សេងទៀត។
TSMC បានប្រកាសថា ប្រាក់ចំណូលក្នុងរយៈពេល៣ខែចុងក្រោយនៃឆ្នាំ ២0២១ បានកើនឡើង ២១.២ភាគរយដល់ ៤៣៨.២ ពាន់លានដុល្លារតៃវ៉ាន់ថ្មី (១៥.៨ ពាន់លានដុល្លារ)។ ប្រាក់ចំណេញគឺ ១៦៦.២ ពាន់លានដុល្លារតៃវ៉ាន់ថ្មី។ TSMC មានទីស្នាក់ការកណ្តាលនៅទីក្រុង Hsinchu កោះតៃវ៉ាន់ ផលិតបន្ទះឈីបដំណើរការសម្រាប់ម៉ាកយីហោធំៗរួមមាន Apple Inc. និង Qualcomm Inc.។
ក្រុមហ៊ុនផលិតបន្ទះឈីបបានទទួលអត្ថប្រយោជន៍ពីតម្រូវការសម្រាប់ទូរគមនាគមន៍ជំនាន់ក្រោយ កុំព្យូទ័រមានប្រសិទ្ធភាពខ្ពស់ និងបន្ទះឈីបសម្រាប់ប្រើប្រាស់ក្នុងផលិតផលពីរថយន្តរហូតដល់ឧបករណ៍វេជ្ជសាស្ត្រ។TSMC បានប្រកាសផែនការកាលពីឆ្នាំមុនដើម្បីវិនិយោគ ១00 ពាន់លានដុល្លាររយៈពេល ៣ ឆ្នាំខាងមុខក្នុងការផលិត ស្រាវជ្រាវ និងអភិវឌ្ឍន៍។
ឧបករណ៍វត្ថុធាតុដើមភាគច្រើនដែលប្រើក្នុងស្មាតហ្វូន ឧបករណ៍វេជ្ជសាស្ត្រ កុំព្យូទ័រ និងផលិតផលផ្សេងទៀតត្រូវបានផលិតនៅតៃវ៉ាន់ កូរ៉េខាងត្បូង និងចិន។ TSMC បានប្រកាសពីផែនការកាលខែតុលា ដើម្បីសាងសង់រោងចក្រផលិតបន្ទះឈីបដំបូងរបស់ខ្លួននៅប្រទេសជប៉ុន។ ក្រុមហ៊ុន និងក្រុមហ៊ុន Sony Corp. ក្រោយមកបាននិយាយថាពួកគេនឹងវិនិយោគរួមគ្នាចំនួន ៧ ពាន់លានដុល្លារនៅក្នុងរោងចក្រនេះ៕
